Ўзбекистонда 7–14 июнь кунлари асосан қуруқ ва нисбатан иссиқ об-ҳаво сақланиб туради. Бу ҳақда Ўзгидромет маълум қилди.
Маълум қилинишича, Қорақалпоғистон Республикаси ва Хоразм вилоятида ҳафта давомида ёғингарчилик кутилмайди. Фақат 7–8 июнь кунлари Қорақалпоғистоннинг айрим ҳудудларида қисқа муддатли ёмғир ёғиши ва момақалдироқ кузатилиши мумкин. Шунингдек, айрим кунларда шамол тезлиги секундига 20–22 метргача кучайиб, чанг-тўзонлар юзага келиши эҳтимоли бор.
Бухоро ва Навоий вилоятларида ҳам ҳафта давомида қуруқ об-ҳаво сақланади. Айрим ҳудудларда шамол кучайиб, чанг-тўзонлар кузатилиши мумкин. Ҳаво ҳарорати кундузи 32–37 даража атрофида бўлади.
Тошкент, Самарқанд, Жиззах ва Сирдарё вилоятларида ёғингарчилик кутилмаяпти. Ҳаво ҳарорати асосан 32–37 даража бўлиб, 9–10 июнь кунлари бироз пасайиб, 30–35 даражага тушади.
Қашқадарё ва Сурхондарё вилоятларида эса энг юқори ҳарорат кузатилиши кутилмоқда. Ҳудудларда 8–14 июнь кунлари кундузи ҳаво ҳарорати 35–40 даражагача кўтарилади.
Фарғона водийси вилоятлари — Андижон, Наманган ва Фарғонада ҳам ёғингарчилик кутилмайди. Ҳаво ҳарорати кундузи 32–37 даража атрофида бўлади.
Республиканинг тоғолди ва тоғли ҳудудларида эса айрим жойларда қисқа муддатли ёмғир ёғиши ва момақалдироқ бўлиши мумкин. Кундузи ҳаво ҳарорати 18–28 даража оралиғида бўлиши прогноз қилинмоқда.
Синоптикларга кўра, ҳафта давомида мамлакатнинг аксарият ҳудудларида қуруқ ва иссиқ об-ҳаво устунлик қилади.
