21 июнь куни Шимолий ярим шар аҳолиси йилнинг энг узун кунини бошдан кечиради. Бу ҳақда Associated Press маълум қилди.
Маълум қилинишича, мазкур астрономик ҳодиса ёзги қуёш туриши деб аталади ва Қуёшнинг осмонда энг юқори нуқтага чиқиши билан изоҳланади. Шу кунларда кундузги ёруғлик давомийлиги энг юқори даражага етади.
Шундан сўнг кунлар аста-секин қисқариб боради ва бу жараён декабрь ойидаги қишки қуёш туришигача давом этади.
Мутахассислар таъкидлашича, "қуёш туриши" атамаси лотинча sol (қуёш) ва stitium (тўхташ) сўзларидан келиб чиққан бўлиб, Қуёш ҳаракатининг осмонда гўё тўхтагандай кўринишини англатади.
Астрономларнинг қайд этишича, Ер ўқининг қиялиги туфайли Қуёш нурлари йил давомида ярим шарлар ўртасида турлича тақсимланади. Бу эса фасллар алмашинуви ва кундуз-тун давомийлигидаги фарқларни юзага келтиради.
