Андижон вилоятида собиқ турмуш ўртоғини ўлдириш учун ёлланма қотил қидирган 52 ёшли аёл қўлга олинди. Бу ҳақда вилоят Ички ишлар бошқармаси хабар берди.
Маълум қилинишича, тезкор маълумотлар асосида олиб борилган текширувлар давомида Асака туманида яшовчи, 1974 йилда туғилган аёл 1972 йилда туғилган собиқ турмуш ўртоғини уй-жой масаласидаги низо сабаб қасддан ўлдиришни режалаштиргани аниқланган.
Аёл ушбу ишни амалга ошириш учун 3000 АҚШ доллари эвазига ёлланма қотил излаган. Ҳуқуқни муҳофаза қилувчи органлар томонидан тезкор тадбир ўтказилиб, шартли равишда ёлланган шахс жалб қилинган.
Тергов маълумотларига кўра, аёл 10 июль куни Асака туманидаги турар жой мажмуаларидан бири олдида қотилликни амалга оширишга келишган шахслар билан учрашган. У собиқ эрини ўлдириш учун дастлаб 5 миллион сўм берган ва қолган маблағни унинг вафот этганига ишонч ҳосил қилганидан кейин тўлашини айтган.
11 июль кунига ўтар кечаси ўтказилган тезкор тадбир давомида шартли ёлланма қотил аёлнинг собиқ турмуш ўртоғини Асака туманидаги дала ҳудудига олиб борган ва унинг ўлдирилгани ҳақида тасаввур уйғотган ҳолда буюртмачи аёлни чақирган.
Аёл собиқ эри вафот этганига ишонч ҳосил қилгач, келишилган пулни беришини билдирган. Шу пайтда у ашёвий далиллар билан қўлга олинган.
"Эримдан қутулиш учун ёлланма қотилга 3000 доллар беришга келишдик. 5 миллион сўмини бердим. Қилган ишимдан пушаймонман. Кечиришингизни сўрайман", — деган аёл.
Мазкур ҳолат юзасидан аёлга нисбатан Ўзбекистон Республикаси Жиноят кодексининг 25, 97-моддаси 2-қисми "и" банди билан жиноят иши қўзғатилган.
