Ёшлар орасида айрим турдаги онкологик касалликлар кўпайиб бормоқда. Олимлар буни организмнинг биологик жиҳатдан тезроқ қариши билан боғлиқ бўлиши мумкин, деб ҳисобламоқда.
Германия Саратонни ўрганиш маркази маълумотларига кўра, мамлакатда 20 ёшдан 39 ёшгача бўлганлар орасида ичак саратони билан касалланиш ҳолатлари сезиларли даражада ошган.
АҚШдаги тадқиқотчилар ҳам шунга ўхшаш тенденцияни кузатган. Мамлакатда касалланиш даражаси Германиядагидан ҳам юқори экани айтилмоқда. Бундан ташқари, суяк илиги ва бачадон танаси саратони каби бошқа онкологик касалликлар бўйича ҳам ўсиш қайд этилган.
Вашингтон университети қошидаги Тиббиёт мактаби олимлари мазкур тенденцияни изоҳлаши мумкин бўлган эҳтимолий боғлиқликни аниқлаган. Уларнинг тадқиқотига кўра, ёшларда хронологик ва биологик ёш ўртасида сезиларли тафовут бор.
Хронологик ёш инсоннинг неча йил яшаганини кўрсатса, биологик ёш организмнинг аслида қай даражада эскирганини акс эттиради. Олимларнинг таъкидлашича, бугунги ёшларнинг айрим аъзо ва тўқималари аввалги авлодларга нисбатан тезроқ қариши мумкин.
Бироқ тадқиқотчилар бу ҳолат саратон касаллигининг бевосита сабаби эканини айтмаяпти. Улар фақат биологик қариш ва ёшлар орасида онкологик касалликлар кўпайиши ўртасида ўзаро боғлиқлик аниқланганини таъкидламоқда.
Олимларнинг айтишича, инсон биологик ёшига маълум даражада таъсир қилиши мумкин. Тадқиқот муаллифларидан бири Рон Яҳимовичнинг таъкидлашича, бу кўрсаткичнинг тахминан 50 фоизи инсоннинг турмуш тарзига, қолган қисми эса генетикага боғлиқ.
Мунтазам жисмоний фаоллик, сифатли уйқу ва соғлом овқатланиш қариш жараёнини секинлаштиришга ёрдам бериши мумкин. Мутахассислар тез қаришнинг эҳтимолий сабаблари сифатида эса ёшликдан ортиқча вазн тўплаш, камҳаракат ҳаёт тарзи ва уйқу етишмаслигини кўрсатмоқда.
