Голливуднинг машҳур жуфтлиги Том Ҳолланд ва Зендая Лондонда "Ўргимчак одам: Янги кун" фильмининг премьерасида биргаликда иштирок этди. Яқинда турмуш қурган актёрлар бу йил Кристофер Нолан суратга олаётган "Одиссея" фильмида ҳам бирга экранга чиқади.
Зендаянинг айтишича, турмуш ўртоғи билан бир майдонда ишлаш қийин эмас, аксинча, улар бир-бирининг энг яқин дўсти бўлгани учун жараён осон кечади.
"У билан ишлаш жуда ёқимли. Энг яқин дўстингиз билан бирга ишлашнинг ўзига хос қулайлиги бор", деган актриса.
Янги фильмда Том Ҳолланд яна Питер Паркер — Ўргимчак одам образини гавдалантирган бўлса, Зендая МЖ ролини ижро этган.
Премьера маросимида Зендая ўргимчак тўри услубидаги безаклар билан ишланган либосда намоён бўлди. Унинг таъкидлашича, фильм мавзусини кийиниш услуби орқали ҳам ифода этишни ёқтиради.
Том Ҳолланд эса 2016 йилдан буён Ўргимчак одам ролини ижро этиб келаётганини эслатиб, янги фильм устидаги иш жараёни унга катта завқ бағишлаганини айтди.
Актёр мазкур фильм унинг Ўргимчак одам сифатидаги сўнгги лойиҳаси бўладими, деган саволга аниқ жавоб бермади. Шу билан бирга, у келажакда ҳам “Marvel” кинематографик оламидаги бошқа қаҳрамонлар билан боғлиқ лойиҳаларда иштирок этиш истаги борлигини маълум қилди.
Асолат Ғуломназарова
