“Best Countries 2026” рейтинги эълон қилинди. Унда Марказий Осиё давлатларидан фақат Қозоғистон ва Ўзбекистон ўрин олди. Мамлакатлар рейтингда мос равишда 75- ва 77-поғоналарни эгаллаган.
Рейтинг WPP BAV — WPP компаниясининг мамлакатлар ва брендларни баҳолашга ихтисослашган тадқиқот бўлими ҳамда Пенсильвания университетининг Уортон бизнес мактаби ҳамкорлигида тайёрланган.
“Best Countries” рейтинги давлатларнинг иқтисодий ҳолати ёки аҳоли турмуш даражасини тўғридан тўғри баҳоламайди. У кўпроқ мамлакатларнинг халқаро сўровнома иштирокчилари томонидан қандай қабул қилинишига асосланади.
2026 йилги тадқиқотда 33 та мамлакатдан 15 минг 131 нафар киши иштирок этган. Улар давлатларни 73 та хусусият бўйича баҳолаган. Ушбу мезонлар ҳаёт сифати, тадбиркорлик, маданий таъсир, тарихий мерос ва давлат қудрати каби 10 та йўналишга бирлаштирилган.
“Best Countries 2026” рейтингида биринчи ўринни Швейцария эгаллаган. Кейинги поғоналардан Япония, Швеция, Канада, Австралия, Германия, Нидерландия, Буюк Британия, Норвегия ва Бирлашган Араб Амирликлари жой олган.
Марказий Осиё давлатлари орасида Қозоғистон 75-ўринни эгаллаган. Мамлакат ҳаёт сифати, тадбиркорлик ва тарихий-маданий мерос кўрсаткичлари бўйича 82-ўринда, маданий таъсир бўйича эса 85-ўринда қайд этилган.
Қозоғистоннинг нисбатан кучли томонлари сифатида ишлаб чиқариш харажатларининг арзонлиги — 17-ўрин, бошқа мамлакатлардан ажралиб туриши — 18-ўрин ҳамда қуролли кучларининг қудрати — 19-ўрин кўрсатилган.
Ўзбекистон рейтингда 77-ўриндан жой олган.
Мамлакатнинг энг яхши кўрсаткичлари бошқа давлатлардан ажралиб туриши ва ишлаб чиқариш харажатларининг арзонлиги билан боғлиқ. Ўзбекистон ушбу мезонлар бўйича мос равишда 13- ва 16-ўринларни эгаллаган.
Мамлакатнинг энг паст кўрсаткичлари эса капиталга эга бўлиш имконияти ҳамда кучли халқаро иттифоқларнинг мавжудлиги бўйича қайд этилган. Ҳар икки мезон бўйича Ўзбекистон 85-ўринни эгаллаган.
Шу тариқа, “Best Countries 2026” рейтингида Марказий Осиёдан фақат Қозоғистон ва Ўзбекистон ўрин олди.
