Дунёнинг энг таъсирли 50 яҳудийси рўйхати эълон қилинди. The Jerusalem Post томонидан тузилган рейтингда сиёсат, бизнес, технология, ҳарбий соҳа, ОАВ ва бошқа йўналишларда катта таъсирга эга шахслар жой олган.
Рейтингнинг биринчи поғонасидан АҚШнинг собиқ президенти Дональд Трампнинг куёви Жаред Кушнер ва қизи Иванка Трамп ўрин олган. Нашр уларнинг гаровга олинганларни озод қилиш ва уйига қайтариш жараёнидаги ролини алоҳида қайд этган.
Иккинчи ўрин Исроил Бош вазири Биньямин Нетаньяхуга берилган. Учинчи поғонадан эса Исроилнинг собиқ ҳарбий раҳбари ва сиёсатчиси Гади Эйзенкот жой олган. Нашр уни мамлакатнинг эҳтимолий бўлажак бош вазирларидан бири сифатида баҳолаган.
Тўртинчи ўринни Исроилнинг собиқ Бош вазири Нафтали Беннет, бешинчи ўринни эса Жаҳон яҳудийлар конгресси президенти Рональд Лаудер эгаллаган. Олтинчи поғонага миллиардер Мириам Аделсон, еттинчи ўринга эса Wiz компанияси раҳбари Ассаф Раппапорт жойлаштирилган.
Технология соҳасидаги таниқли шахслардан OpenAI раҳбари Сэм Альтман ва Meta асосчиси Марк Цукерберг рейтингнинг тўққизинчи ўринини биргаликда эгаллаган. Нашр уларни сунъий интеллект соҳасини ривожлантираётган технологик етакчилар сифатида кўрсатган.
Рейтингнинг кейинги ўринларида журналист Бари Вайс, BlackRock раҳбари Ларри Финк, Нью-Йорк полицияси комиссари Жессика Тиш, АҚШ сиёсатчиси Стивен Миллер ва Исроил Президенти Ицхак Герцог каби шахслар ҳам бор.
Рўйхатда Google ҳаммуассиси Сергей Брин, Oracle асосчиси Ларри Эллисон, инвестор Билл Акман каби бизнес ва технология соҳаси вакиллари ҳам ўрин олган.
The Jerusalem Post мазкур рейтингни таъсир кўлами асосида шакллантирган бўлиб, унда шахсларнинг сиёсат, иқтисодиёт, технология, хавфсизлик ва жамиятга кўрсатаётган таъсири инобатга олинган.
