22 сентябрь куни Германиянинг Рейнланд-Пфальц федерал ерида жойлашган Шпанғдалем АҚШ ҳарбий-ҳаво базасида F-16 қирувчи самолёти ҳалокатга учради. Ҳодиса оқибатида самолёт учувчиси жароҳатланган ва тиббий ёрдам кўрсатиш учун шифохонага олиб кетилган.
Маълум қилинишича, F-16 самолёти АҚШ Ҳарбий-ҳаво кучларининг 52-қирувчи қаноти таркибига кирган. У маҳаллий вақт билан тахминан соат 14:30 да одатий машғулот парвозидан қайтиб, Шпанғдалем базасига қўниш вақтида ҳалокатга учраган. Учувчи катапульта ёрдамида самолётни тарк этишга улгурган.
Ҳодиса жойи яқинида бўлган гувоҳлар осмонда катта қора тутун устуни кўтарилганини кўрган. Шпайхер шаҳри мэри Бирте Томсеннинг айтишича, у Бейлинген ва Шпайхер шаҳарлари ўртасида ҳаракатланаётганида реактив самолётнинг тезлик билан пастлаганини ва ортидан қора тутун кўтарилганини кўрган.
Ҳодиса жойига ёнғин хавфсизлиги ва фавқулодда хизматлар жалб қилинган. Кейинчалик маҳаллий хизматлар ёрдамига эҳтиёж қолмагани маълум қилинган.
АҚШ ҳарбийлари самолёт ҳалокатининг сабаблари ҳозирча аниқланмаганини ва воқеа юзасидан тергов олиб борилаётганини билдирган.
