Чжан Юся ва Лю Чжэньли коррупция, ваколатни суиистеъмол қилиш ва бошқа жиддий қоидабузарликларда айбланиб, Хитой Коммунистик партияси сафидан чиқарилди ҳамда Қуролли кучлар таркибидан бўшатилди. Бу ҳақда расмий баёнотга таяниб, «Reuters» хабар берди.
Чжан Юся Хитой Қуролли кучларининг энг юқори бошқарув органи — Марказий ҳарбий кенгаш раиси ўринбосари лавозимида ишлаган. У Си Цзиньпиндан кейин мамлакатдаги иккинчи юқори мартабали ҳарбий раҳбар ҳисобланган.
Лю Чжэньли эса Марказий ҳарбий кенгаш аъзоси ҳамда унинг Бирлашган штаби бошлиғи лавозимларини эгаллаган.
Маълум қилинишича, икки ҳарбий раҳбарга нисбатан тергов бошлангани ҳақида жорий йил январь ойида хабар берилган. Август охирида улар Марказий ҳарбий кенгаш таркибидан ҳам чиқарилган.
Хитойнинг «Синьхуа» агентлиги тарқатган расмий ҳужжатлардан иқтибосда Чжан Юся ва Лю Чжэньли «сиёсий интизом ва сиёсий қоидаларни жиддий равишда бузгани, гуруҳбозлик ва фракциячилик билан шуғуллангани, партияга нисбатан садоқатсизлик ва инсофсизлик қилгани» қайд этилган.
Расмий баёнотда, шунингдек, улар коррупция, хизмат вазифаларини бажармаслик ва ваколатларини суиистеъмол қилишда айбланаётгани айтилган. Қоидабузарликлар билан боғлиқ маблағлар «фавқулодда йирик», уларнинг хусусияти ва оқибатлари эса «ҳаддан ташқари оғир» деб баҳоланган.
Чжан Юся ва Лю Чжэньлини партиядан чиқариш ҳақидаги қарор Си Цзиньпин раислигида ўтказилган Хитой Коммунистик партияси Марказий қўмитаси Сиёсий бюроси мажлисида тасдиқланган.
Уларнинг иши қонунга мувофиқ кўриб чиқиш ва жавобгарликка тортиш учун ҳарбий прокуратурага юборилади.
