АҚШ президенти Дональд Трампнинг CNN, MS NOW ва Politico журналистларини Оқ уйга киришдан маҳрум этиш қарори судгача етиб борди. Учта йирик ОАВ Трамп маъмурияти устидан федерал судга қўшма даъво киритиб, журналистларнинг аккредитациясини тиклашни талаб қилмоқда.
Трамп 19 сентябрь куни мазкур ОАВларни Оқ уйдан четлатишини эълон қилган. Президент уларни маъмурият фаолиятини «ёлғон» ва «адолатсиз» ёритишда айблаган. Ортидан CNN, MS NOW ва Politico журналистларининг Оқ уй ҳудудига кириши чекланган, уларнинг доимий матбуот гувоҳномалари фаоллаштирилмаган.
ОАВ вакиллари эса қарор журналистларнинг материаллари ҳукуматга ёқмагани учун қабул қилинганини билдирмоқда. Улар ўз даъвосида мазкур ҳаракат АҚШ Конституциясининг Биринчи тузатишида белгиланган матбуот эркинлигига ҳамда Бешинчи тузатишда кафолатланган ҳуқуқий жараён талабларига зид эканини кўрсатган. Суддан тақиқни вақтинча тўхтатиш ва журналистларга Оқ уйга кириш имкониятини қайтариш сўралган.
Трамп эса бу қарорни эркин матбуотга қарши ҳаракат эмас, балки «сохта хабарлар»га қарши кураш деб атаган. У ОАВлар мамлакат миллий хавфсизлигига таҳдид солувчи маълумотларни тарқатаётганини даъво қилган, аммо бу иддаосини тасдиқловчи далил келтирмаган.
Вазият Оқ уйдаги телевизион «пул» тизимига ҳам таъсир қилди. CNN ушбу тизимнинг бешта асосий аъзосидан бири бўлиб, президент тадбирларини навбатма-навбат тасвирга олиб, видеолавҳаларни бошқа телеканалларга тақдим этади.
CNNга навбатдаги тасвирга олиш вазифасини бажариш имкони берилмаганидан кейин ABC, CBS, NBC ва Fox News ҳам президент тадбирларини телевизион «пул» тизими орқали ёритишни тўхтатди. Ушбу тизим президентнинг тадбирларини битта камера гуруҳи орқали тасвирга олиб, видеони бир вақтнинг ўзида бошқа ОАВларга тарқатиш имконини беради.
АҚШдаги мазкур можаро бўйича суд мажлиси 23 сентябрь кунига белгиланган. Иш Вашингтон округи федерал суди судьяси Тимоти Келлига бириктирилган.
