Сурия президенти Аҳмад аш-Шараа АҚШ президенти Дональд Трамп билан Оқ уйдаги учрашуви чоғида Голан тепаликлари масаласида ҳазил тариқасида Нью-Жерси штатини Исроилга беришни таклиф қилганини айтди. Бу ҳақда Zamon.uz маълум қилди.
Аш-Шараа бу воқеани 22 сентябрь куни Нью-Йоркда Атлантика Кенгаши томонидан ташкил этилган тадбирда эслаган. Унинг айтишича, Трамп Голан тепаликлари Исроил суверенитети остида эканини айтганида, у АҚШ президентига ҳазил билан:
"Нега Нью-Жерсини Исроилга бермайсиз? Сиз Голан тепаликларига эгалик қилмайсиз, шунинг учун уни Исроилга беришга ҳақингиз йўқ. Аммо Нью-Жерси сизники. У ерда Трампга овоз бермайдиган демократлар ҳам кўп", — деган.
Сурия президенти бу гапни ҳазил тариқасида айтганини таъкидлаган. Бироқ у Голан тепаликлари масаласида позицияси жиддий эканини билдирган.
"Голан тепаликлари ўз халқига тегишли. Шунинг учун на Сурия президенти, на Америка президенти, на бошқа бирор киши уни бошқаларга бериш ёки ундан воз кечиш ҳуқуқига эга", — деган аш-Шараа.
Голан тепаликларининг катта қисми 1967 йилги Олти кунлик урушда Исроил назоратига ўтган. 1981 йилда Исроил бу ҳудудга ўз қонунлари ва маъмуриятини бир томонлама татбиқ этган. БМТ Хавфсизлик Кенгаши 497-резолюциясида мазкур қарор халқаро ҳуқуқий кучга эга эмаслиги белгиланган.
2019 йилда Дональд Трампнинг биринчи президентлик даврида АҚШ Исроилнинг Голан тепаликлари устидан суверенитетини тан олган.
Аш-Шараа, шунингдек, Сурия ва Исроил ўртасида АҚШ воситачилигида тўғридан-тўғри музокаралар олиб борилаётганини маълум қилган. Унинг сўзларига кўра, томонлар аввалги музокараларда айрим масалалар бўйича келишувга яқинлашган, аммо якуний келишувга эришилмаган.
