АҚШ Президенти Дональд Трамп Хитой раҳбари Си Цзиньпинга АҚШдан қурол сотиб олишни таклиф қилди. Бу ҳақда АҚШнинг Хитойдаги элчиси Дэвид Пердью “Fox News” телеканалига берган интервьюсида маълум қилди.
Унинг сўзларига кўра, Трамп бу таклифни Си Цзиньпиннинг ўтган ҳафтада АҚШга ташрифи чоғида билдирган. Бу пайтда Хитой томони Вашингтоннинг Тайванга қурол етказиб бераётганидан хавотир билдирган.
“Президент Трамп доим: "Қаранг, биз дунё бўйлаб бошқа давлатларга ҳам қурол сотяпмиз», деб айтади. Бир пайт у ҳатто раис Сидан бирор нарса сотиб олишни хоҳлайсизми, деб сўради”, деган Дэвид Пердью.
Бироқ элчининг интервьюсидан кўп ўтмай, АҚШ маъмурияти “The New York Times” газетасига Вашингтоннинг Хитойга қурол сотиш режаси йўқлигини маълум қилди. АҚШ Давлат департаменти ҳам бундай савдога қонун йўл қўймаслигини таъкидлаган.
Маълумот учун, Хитой Тайванни ўз ҳудудининг бир қисми деб ҳисоблайди ва орол устидан назорат ўрнатишни мақсад қилган. Пекин бунинг учун зарур бўлса, ҳарбий куч ишлатиш имкониятини ҳам истисно қилмайди.
АҚШ қонунчилиги эса Вашингтонни Тайванга ўзини ҳимоя қилиши учун зарур бўлган қурол-яроғларни етказиб беришга мажбурлайди.
