Яқинда у Туркия Президенти Ражаб Тоййиб Эрдўғон билан учрашди. Ёш спортчининг энг катта орзуси эса Кыркпынар мусобақасида бошпаҳлавон бўлиш.
Усмон Али Давутоғлу Танзанияда туғилган. Ота-онасидан айрилганидан сўнг у ўша вақтда Туркиянинг Дор-эс-Саломдаги элчиси бўлган Али Давутоғлу ва унинг рафиқаси Ешим Мечо Давутоғлу томонидан фарзандликка олинган.
У дастлаб футбол ва гиламдаги кураш билан шуғулланган. Кейинчалик Баликесирда ёғли курашга қизиқиб, ушбу спорт тури билан жиддий шуғуллана бошлаган. Айни пайтда 65 килограммгача бўлган вазн тоифасида мусобақаларда иштирок этмоқда.
Тенгдошлари уни “Араб Усмон” деб аташади. Усмоннинг айтишича, унинг асосий мақсади — Туркиянинг машҳур Кыркпынар ёғли кураш мусобақасида бошпаҳлавон бўлиш.
“Мақсадим — бошпаҳлавон бўлиш. Бунинг учун кўп меҳнат қиламан. Оилам ва Туркияни фахрлантиришни истайман”, деди у.
“Президентимизни кўриб жуда ҳаяжонландим”
Усмон яқинда Истанбулда ўтказилган ёғли кураш бўйича Президент кубогида Ражаб Тоййиб Эрдўғон билан учрашди.
Кураш кийимида президент ҳузурига борган Усмон унинг қўлини ўпди. Ёш спортчи бу учрашувдан қаттиқ ҳаяжонланганини айтди.
“Президентимиз билан учрашганимда жуда ҳаяжонландим. Унинг олдига бордим, қўлини ўпдим ва бироз суҳбатлашдик. У билан учрашганимдан жуда фахрландим”, деди у.
Усмоннинг мураббийи Сертач Чавдар ёш спортчида ёғли курашга қизиқиш билан бирга бу спорт турида ўзини кўрсатиш имконияти ҳам борлигини таъкидлаган.
Кыркпынарнинг бошпаҳлавонларидан бири Мустафо Тош ҳам Усмоннинг курашини кузатиб келмоқда. У ёш спортчи келажакда катта натижаларга эришиши мумкинлигини айтган.
Усмон эса машғулотларини давом эттириб, Кыркпынарда бошпаҳлавон бўлиш мақсади сари ҳаракат қилмоқда.
