Тошкент шаҳрининг Яшнобод туманида компьютер технологиялари соҳасида консалтинг хизматлари кўрсатиш ниқоби остида онлайн қимор ўйинларига хизмат кўрсатиб келган гуруҳ фаолиятига чек қўйилди. Гуруҳ томонидан сўнгги 6 ойда 4 миллион долларлик пул айланмаси амалга оширилгани аниқланган.
Бу ҳақда Ички ишлар вазирлиги Кибержиноятларга қарши курашиш департаменти хабар берди.
Маълум қилинишича, гуруҳ Ўзбекистон, Саудия Арабистони, Бирлашган Араб Амирликлари, Уммон, Баҳрайн, Қатар, Қувайт ва бошқа давлатларнинг қарийб 60 минг нафар фуқаросини онлайн қимор платформаларига жалб қилиш ҳамда уларда иштирок этиш учун шароит яратиш билан шуғулланган.
Гуруҳ ичида операторлар, супервайзерлар, кассирлар, ҳисобчи-таҳлилчилар ва менежерлардан иборат алоҳида бўлимлар ташкил этилган. Фаолиятда махсус дастурий таъминот, шифрланган алоқа воситалари ва рақамли изларни яшириш технологияларидан фойдаланилган.
Тезкор тадбир давомида сервер қурилмалари, компьютерлар, ноутбуклар, мобиль телефонлар, банк карталари, пул маблағлари ва бошқа ашёвий далиллар расмийлаштириб олинган.
Ҳолат юзасидан жиноят иши қўзғатилган. 16 нафар шахс билан тезкор суриштирув ва тергов ҳаракатлари ўтказилган бўлиб, гуруҳнинг 11 нафар аъзоси процессуал тартибда ушланган.
Шунингдек, жиноятга бевосита алоқадор бўлган ва масофадан туриб хизмат кўрсатган бошқа шахслар ҳам аниқланган. Ҳозирда тергов ҳаракатлари ва тезкор-қидирув тадбирлари давом эттирилмоқда.
