Португалия терма жамоаси сардори Криштиану Роналду миллий жамоа йиғинини тарк этгани сабабли интизомий жазога тортилиши мумкин. Футболчига нисбатан бир ойдан олти ойгача дисквалификация қўлланиши эҳтимоли бор. Бу ҳақда “Mirror” нашри хабар берди.
Маълум қилинишича, Португалия футбол федерацияси қоидаларига мувофиқ, Роналдуга нисбатан автоматик равишда интизомий чора кўрилган. Энди жазо муддатини махсус интизомий кенгаш белгилайди.
Агар дисквалификация бир ойдан ортиқ муддатга белгиланса, 41 ёшли футболчи келаси ой Дания ва Уэльсга қарши бўлиб ўтадиган Миллатлар лигаси учрашувларини ўтказиб юбориши мумкин.
ESPN маълумотига кўра, интизомий кенгаш футболчининг узр сўрагани каби ҳолатларни ҳам инобатга олади. Шу боис Роналдуга нисбатан нисбатан қисқа муддатли жазо тайинланиши мумкин.
Аввалроқ португалиялик ҳужумчи терма жамоа йиғинини муддатидан олдин тарк этган эди. Унинг таъкидлашича, бунга бош мураббий Жорже Жезушнинг ўз ваъдаларини икки марта бажармагани сабаб бўлган.
Роналду Уэльсга қарши 1:0 ҳисобида якунланган учрашувда майдонга тушган, аммо Норвегияга қарши 2:1 ҳисобидаги баҳсда захирада қолдирилган. Футболчининг айтишича, дастлаб у мазкур ўйинда иштирок этиши режалаштирилмаган. Бироқ мураббий ундан зарурат туғилса, 30 дақиқа майдонда ҳаракат қилишга тайёр туришни сўраган. Шунга қарамай, у учрашув давомида майдонга туширилмаган.
Маълумот учун, Криштиану Роналду фаолияти давомида беш марта “Олтин тўп” соҳиби бўлган, беш марта Чемпионлар лигасида ғолиб чиққан, Португалия терма жамоаси билан Европа чемпионати ва Миллатлар лигасида ғолибликни қўлга киритган.
У 2022 йил декабридан буён Саудия Арабистонининг “Ал-Наср” клубида тўп сурмоқда. Манбада келтирилишича, Роналду фаолияти давомида 980 та гол урган. Уларнинг 834 таси клублар, 146 таси эса Португалия терма жамоаси сафида киритилган.
