Машҳур хонандалар Шер ва Кэти Перри, актриса Скарлетт Йоханссон ва бошқа юлдузлар АҚШнинг янги президенти Дональд Трампга қарши аёллар томонидан ўтказиладиган норозилик намойишида иштирок этади, деб хабар берди “Ria.ru” нашри.
Мазкур норозилик намойиши 21 январь куни, янги президентнинг инаугурациясидан кейин Вашингтонда дўстона тарзда ўтказилиши кўзда тутилган. Юқорида номлари келтирилган машҳурларга актрисалар Америка Феррера, Эми Шумер, Жулианна Мур ва Фрэнсис Макдормэндлар ҳам қўшилади.
Ўша куни АҚШнинг бошқа штатларида ҳам худди шундай намойишлар ўтказилади. Масалан, Юта штатида ўтказиладиган тадбирга актриса ва телебошловчи Челси Хэндлер раҳбарлик қилади.
АҚШнинг 45 президенти бўлган Дональд Трампнинг инаугурацияси 20 январь куни маҳаллий вақт билан соат 12.00 да, конгресслар ўтказиладиган Капитолия биносида бўлиб ўтади. Трамп инаугурация нутқини шахсан ўзи ёзишни режалаштирган. Мазкур тадбирда уч миллионга яқин одам иштирок этади.
