Наманган халқаро аэропортида Ҳиндистонга учиб кетмоқчи бўлган йўловчининг юкидан майиз ва ёнғоқ орасига яширилган олтин қуймалар ҳамда заргарлик буюмлари топилди. Бу ҳақда Божхона қўмитаси матбуот хизмати хабар берди.
Маълум қилинишича, божхона назорати вақтида йўловчининг майиз ва ёнғоқ солинган пакети текширилган. Натижада унинг ичидан қўлбола усулда тайёрланган тўртта олтин қуйма ва заргарлик буюмлари аниқланган.
Заргарлик буюмларининг умумий оғирлиги 90,45 граммни, қиймати эса 108 миллион 540 минг сўмни ташкил этган.
Ҳозирда мазкур ҳолат юзасидан текширув олиб борилмоқда.
