Россия Ички ишлар вазири Владимир Колокольцев меҳнат мигрантларининг мамлакатга ишламайдиган оила аъзоларини олиб келишини молиявий жиҳатдан чеклашни таклиф қилди. Бунинг учун Россияга келган ҳар бир ишламайдиган оила аъзосига қўшимча солиқ белгилаш назарда тутилмоқда. Бу ҳақда вазир Федерация Кенгашидаги ҳукумат соатида маълум қилди.
Колокольцевнинг айтишича, вазирлик томонидан меҳнат мигрантларининг Россияга ишламайдиган қариндошларини олиб келиш имкониятини молиявий жиҳатдан чеклайдиган қонун ташаббуси илгари сурилган.
"Биз меҳнат мигрантларининг Россияга ўзлари билан ишламайдиган қариндошларини олиб келиш имкониятини молиявий жиҳатдан чеклашга қаратилган қонунни қабул қилиш ташаббусини илгари сурдик. 2027 йилдан бошлаб келаётган ҳар бир оила аъзоси учун қўшимча солиқ солиш тартиби жорий этилади", — деди у.
Вазирнинг таъкидлашича, ушбу чора ижтимоий соҳага тушаётган юкни камайтиришга қаратилган. Яъни Россияда меҳнат қилаётган хорижий фуқароларнинг ишламайдиган оила аъзолари учун ҳам қўшимча молиявий мажбурият юклаш таклиф этилмоқда.
Ҳозирча мазкур тартибни жорий этиш бўйича қонунчилик ташаббуси илгари сурилгани маълум қилинган. Унинг қандай механизм асосида амалга оширилиши ва солиқ миқдори ҳақида эса батафсил маълумот берилмаган.
