АҚШ Иммиграция ва божхона полицияси ходимлари Бруклинда хорижда содир этилган қотиллик иши бўйича қидирувда бўлган 35 ёшли Ўзбекистон фуқароси Собиржон Собировни қўлга олди. Бу ҳақда Slavic Sacramento нашри хабар берди.
Маълумотларга кўра, 2013 йилда эркак Таиландда ҳибсга олинган ва ўз қиз дўстини ўлдирганини тан олган. Шундан сўнг у қиз дўстининг жасадини чемоданга жойлаб, каналга ташлаб юборган.
2020 йилда Ўзбекистонда у ўғирлик жинояти учун судланиб, беш йилга озодликдан маҳрум этилган. Шунингдек, АҚШда ҳам у Нью-Йорк полициясининг таъқиб қилиш билан боғлиқ иши доирасида эътиборига тушган. 2024 йилда Кингс округи суди унга нисбатан ҳимоя ордери чиқарган.
Нашр маълумотига кўра, АҚШ чегара хизмати Собировни илк бор 2023 йил апрель ойида Аризона штатидаги Луквилл ҳудудида чегарани ноқонуний кесиб ўтганидан кейин қўлга олган. Ўша вақтда у 110 нафар мигрантдан иборат гуруҳ таркибида бўлган.
Қўлга олинганидан сўнг у Нью-Йоркдаги иммиграция суди эшитувларида иштирок этиш мажбурияти билан озод қилинган. Бироқ эркак иммиграция органларида фақат бир марта — 2024 йил май ойида рўйхатдан ўтган ва шундан кейин белгиланган тартибда келмай қўйган.
Жорий йил октябрь ойи ўрталарида ICE ходимлари уни Бруклиндаги уйи яқинида қўлга олган. Ҳозирда у иммиграция полицияси ҳибсида сақланмоқда ва депортация масаласи бўйича суд жараёнини кутмоқда.
