Қашқадарё вилоятининг Қамаши туманида келинини мунтазам калтаклаб, ҳақоратлаган, яқинлари билан мулоқот қилишини чеклаган ва унга руҳий босим ўтказиб келган қайнонага суд ҳукми ўқилди. Оқибатда ўз жонига қасд қилган келиннинг ўлимига сабабчи деб топилган аёл 5 йил муддатга озодликдан маҳрум этилди.
Darakchi.uz суд ҳужжатлари билан танишди.
Суд ҳужжатларига кўра, 1976 йилда туғилган Г.Ч. 2023 йил кузида ўғли Х.М.ни Э.А.га уйлантирган. Шундан сўнг келин қайнонаси билан бир хонадонда яшай бошлаган. Бироқ оиладаги муносабатлар вақт ўтиши билан тазйиқ ва зўравонликка айланган.
Қайд этилишича, қайнона келинини мунтазам ҳақоратлаб, урган, унинг ҳуқуқ ва эркинликларини чеклаган. 2024 йилнинг октябрь–декабрь ойларида келинига тегишли тилла сирғалардан бир жуфтини бошқа шахсга бериб юборганини билгач, унинг ота-онасини чақиртириб, бу масалани муҳокама қилган. Шундан кейин келинига нисбатан руҳий босимни янада кучайтирган.
Қайнона мактабда фаррош бўлиб ишлаган даврида келинини ўз ўрнига ишга чиқишга мажбурлаган. Унга чиқинди тозалаш, пол артиш, сув ташиш ва сепиш каби ишларни бажартирган. Шунингдек, келинини ўғлига муносиб эмаслиги билан камситиб, гапига кирмаса, ота-онасининг уйига ҳайдаши ва ўғлини бошқага уйлантириши билан қўрқитган.
Бундан ташқари, келинининг телефонини олиб қўйиб, ота-онаси ва яқинлари билан мулоқотини назорат қилган. Э.А. улар билан бошқа одамларнинг телефони орқали гаплашишга мажбур бўлган. Қайнона эса суҳбатлар давомида унинг ёнида туриб, ким билан ва нима ҳақида гаплашаётганини кузатган.
2025 йил 30 май куни келинининг ухлаб қолганидан норози бўлган Г.Ч. жанжал кўтариб, уни ота-онасининг уйига ҳайдаган. Кейинчалик эса ўғлига ҳам хотини қўнғироқ қилса, телефонни ўчириб қўйишни буюрган.
10 июнь куни Э.А. эҳтиётсизлик оқибатида миксерни синдириб қўйган. Буни баҳона қилган қайнона уни ҳақоратлаб, синган буюмлар ўрнига ота-онаси янгисини олиб келишини талаб қилган. Келиннинг укаси янги буюмларни олиб келганидан кейин ҳам жанжал давом этган. Қайнона келинини уриб-тепган. Ўша куни Э.А. ўз жонига қасд қилишга уринган.
Эртаси куни эса қайнона вояга етмаган қизи билан бирга келинини яна калтаклаган. Унинг чақалоғини олиб қолиб, келинни уйдан ҳайдаган.
Шундан сўнг Э.А. маҳалла фуқаролар йиғинига мурожаат қилиб, қайнонаси билан келиша олмаётганини билдирган. У ота-онасининг уйида вақтинча яшаш учун кийим-кечакларини маҳалла ходимлари ҳамроҳлигида олиб кетишга ёрдам сўраган. Ушбу мурожаат юзасидан тегишли далолатнома ҳам тузилган.
Бироқ оиладаги тазйиқлар тўхтамаган. 2025 йил 28 июль куни қайнона келини билан яна жанжаллашиб, унинг ўнг кўзига урган, фарзандини олиб қўйган ва калтаклаган. Ўша куни Э.А. ўз жонига қасд қилиб вафот этган.
Суд қайнонанинг келинига нисбатан мунтазам равишда руҳий ва жисмоний тазйиқ ўтказгани, уни ўзини ўзи ўлдириш даражасига етказганини аниқлаган.
Жиноят ишлари бўйича Қамаши туман судининг 2026 йил 16 февралдаги ҳукми билан Г.Ч. Жиноят кодексининг 103-моддаси 2-қисми «а» ва «б» бандларида назарда тутилган жиноятни содир этганликда айбдор деб топилган. Унга нисбатан 5 йил озодликдан маҳрум қилиш жазоси тайинланган. Аёл суд залининг ўзида қамоққа олинган.
Ҳимоячи ҳукм устидан апелляция шикояти берган, бироқ 2026 йил апрель ойида суд ҳукми ўзгаришсиз қолдирилган. Октябрь ойида киритилган тафтиш шикояти ҳам Қашқадарё вилояти судининг жиноят ишлари бўйича судлов ҳайъати томонидан рад этилган.
Қайд этиш керакки, бу Қашқадарёда келинига нисбатан узоқ вақт давомида зўравонлик қилган қайнонага боғлиқ ягона ҳолат эмас. Аввалроқ Чироқчи туманида ҳам келинини бир неча йил давомида калтаклаб, ҳақоратлаб ва руҳий босим остида ушлаб келган аёл 5 йилга озодликдан маҳрум этилган эди.
