Қирғизистон махсус хизмати Бишкекда рўй берган авиаҳалокатни “миллатни тозалаш” деб атаган аёлни сўроқ қилди

Қирғизистон давлат миллий хавфсизлик қўмитаси Бишкек шаҳри яқинига қулаган юк самолётининг ҳалокатини “миллатни тозалаш”, деб атаган тиббиёт академиясининг собиқ ўқитувчиси Таттигул Дооталиевани сўроқ қилди, деб хабар берди “Lenta.ru” нашри.

Дооталиеванинг Facebook саҳифасида ёзган изоҳини хавфсизлик хизмати ходимлари миллатлар орасига нифоқ солиш мақсадида ёзилган, деб қабул қилди. Аёл авиаҳалокатни “миллатни тозалаш”, ҳалок бўлганларни эса асосан мамлакатнинг жанубий ҳудудидан кўчиб келган қирғиз миллатига мансуб бўлмаган одамлар, деб ёзган. У мазкур ёзувни ижтимоий тармоққа жойлаштирганидан кейин тиббиёт академиясидан ишдан бўшатилди. Парламент депутати Омурбек Бабанов уни тиббиёт академиясидан ишдан бўшатишни талаб қилди. Унинг ҳамкасби Улуғбек Ормонов Дооталиевага нисбатан жиноят иши қўзғашни таклиф қилди.

Эслатиб ўтамиз, 16 январь куни Манас аэропорти яқинидаги қишлоқ устига Гонконг-Истанбул рейси йўналишида учаётган Туркиянинг “Боинг 747-400” юк самолёти қулаган. Ҳалок бўлганлар ҳақидаги маълумотларга ҳозиргача аниқлик киритилмоқда. Қирғизистон республикаси бош вазири ўрибосари Мухамметкалий Абулғозиев суд-экспертиза марказида авиаҳалокатда ҳалок бўлган 37 нафар одамнинг шахси аниқланганини, улардан 17 нафари болалар эканлигини маълум қилган. Мамлакат ФВВ эса, 31 нафар одам ҳалок бўлди, деб хабар берган. Самолёт қулаши оқибатида 30 та уй вайронага айланган. Мамлакат ҳукумати ҳалок бўлганларнинг оиласига 70 минг сомдан (минг долларга яқин) ёрдам пули ажратган.