Австралиялик актёр маҳаллий Bliss n Eso хип-хоп гуруҳининг қўшиғига суратга олинаётган клипнинг съёмка жараёнида отишмадан ҳалок бўлди, деб хабар берди “Тjournal.ru” нашри.
Мазкур клипда бардаги отишма акс этиши лозим эди. Маҳаллий полициянинг хабар беришича, хавфли съёмка жараёнида гуруҳнинг ўзи иштирок этмаган, уларнинг саҳнаси алоҳида суратга олинган. Съёмка пайтида актёрлардан бири кўкрагига теккан ўқдан ҳалок бўлди. Ҳозирда полиция мазкур фактга ойдинлик киритмоқда.
Ҳуқуқ-тартибот идораси ходимлари актёрнинг ўлимини “иш пайтида олинган жароҳат”, деб тан олди. Съёмка гуруҳи воқеага ойдинлик киритишда полицияга ёрдам бермоқда.
Қотиллик содир этилган Brooklyn Standard барининг эгаси съёмка ишларини амалга ошириш учун барни бир кунга ижарага берганлигини маълум қилди. Воқеа содир бўлганда барда ишловчи ходимлардан ҳеч ким бўлмаган. Гуруҳ аъзолари клипда суратга тушишни хоҳловчиларни кастинг асосида танлаб олган.
