Россиялик коллекционерлар совет элиталарининг автомобилларини юқори қадрлашади. Куни кеча Михаил Горбачёвнинг автопаркидан бўлган ЗИЛ сотувга қўйилди, мазкур автомобиль иккита “Майбах”нинг пулига сотилмоқда.
Қозоғистоннинг ихтисослашган сайтларидан бирида ҳукуматнинг ЗИЛ-41047 лимузини савдоси ҳақида эълон пайдо бўлди, дея хабар беради Auto.Mail.ru. Эълон муаллифининг таъкидлашича, мазкур автомобилдан СССР президенти эмас, асосан унинг рафиқаси Раиса Горбачева фойдаланган.
Бой ўтмишга эга автомобилнинг Алматидан бўлган ҳозирги эгалари уни 75 000 000 тенгега баҳолашди, бу эса 13,9 млн рубл дегани.
“Машина оригинал ҳолатда, реставрация қилинмаган. Машина Раиса Максимовна Горбачеваники. Барча ҳужжатлар мавжуд”, - дейилади эълонда.
1988 йилда чиқарилган Лимузин 3 000 километр юрган, шу сабабли автомобиль деярли янги ҳолатда.
Мазкур автомобилнинг оригинал нусхаси 2002 йилда Қозоғистон президенти учун чиқарилган.
