Россиянинг Белгород вилоятидаги Тетеревино қишлоғида яшовчи Юля исмли қиз ёнаётган уйдан уч нафар укаси ва икки нафар синглисини олиб чиқди, деб хабар берди “Тvzvezda.ru” нашри.
“Онаси Юляга укаларига қараб ўтиришни буюриб, ўзи яқин орада жойлашган ўрмондан ўтин териб келишга кетган. Ёнғин бошланганда Юля уйда 2009, 2011, 2015 йилда туғилган укалари ва 2008, 2013 йилда туғилган сингиллари билан ўйнаб ўтирган. Уйнинг ёнаётганини кўрган болалар каравот тагига, шкафнинг ичига беркинган. Юля ука-сингилларини ёнига чақириб, дераза ойнасини мушти билан синдирган ва уларни адёлга ўраб, бирин-кетин ташқарига ирғитган”, деб маълумот берди Россия ФВВ матбуот хизмати.
Юля энг охирги укасини деразадан ташлаётганда ён қўшнисининг ёрдамга югуриб келаётганини кўрган, болани унга узатгач, ўзи ҳушидан кетган. У ўзига келганда, ҳамма ука-сингилларини қутқарганига ишонч ҳосил қилиш учун уларни қайта-қайта санаган. Ҳозирда болаларнинг ҳаммаси соғ-саломат, ҳеч ким жабрланмаган.
