Бидъатга берилган ота-онаси томонидан ташлаб кетилган нигериялик бола мактабга чиқди, деб ёзади “Lenta.ru”.
Болакай Даниядаги ҳайрия ташкилоти асосчиси Аня Ринггрен Ловен томонидан бир йил аввал қутқариб қолинган эди.
2016 йилнинг январь ойида Ловен озиб кетган икки ёшли болакайга сув бераётгани акс этган сурат ижтимоий тармоқларда кенг тарқалган ва муҳокамаларга сабаб бўлган эди.
Боланинг қариндошлари уни жодугарликда айблаб, ундан воз кечишган эди. Даниялик аёл ўзи ва турмуш ўртоғи томонидан Нигерия шарқида асос солинган болаларга ёрдам кўрсатувчи масканга болани олиб келди.
Ловен The Huffington Post нашрига маълум қилишича, ўшанда унга кимдир қўнғироқ қилган ва қариндошлари воз кечган бола ҳақида хабар берган.
“Биз у икки-уч ёшда эканлигини эшитганимиздан сўнг, зудлик билан болага ёрдам кўрсатишга ошиқдик. Бундай кичкина болалар узоқ муддат кўчада яшай олмайди”, дейди Ловен.
Улар болани топишганида, у қорни тўйиб овқатланмаганидан ўта озиб кетган ва аянчли, қаровсиз аҳволда бўлган. Яқинда Ловен ўзининг ижтимоий тармоқлардаги саҳифаларида болакайнинг янги суратни эълон қилди. Унда аёлнинг болага сув ичираётгани акс этган. Суратда болакайнинг анча тўлишиб қолганини кўриш мумкин.
“Бугун бутун дунё Хоуп исмли болакай ҳақида билганига 1 йил тўлди. Бу ҳафта Хоуп мактабга боради”,—деб ёзди Ловен суратни изоҳлаб.
