​Қалбларга илиқлик бахш этувчи хайр-саховат

Урушларга, турли табиий офатларга, фалокатларга тўлиб-тошган оламда эзгулик учун ҳам жой топилади. Хайрли ишлар амалга оширилар экан, Она сайёрамиз энг гўзал маскан бўлиб қолаверади. Ҳар қандай шароитда ҳам эзгулик ёвузликни енгади. Қуйида бутун дунё миқёсида савоб ишларни амалга оширган одамлар тўғрисидаги воқеаларни тўпладик. Бу инсонлар бошқаларга ёрдам бериш учун баъзи бир белгиланган қонун-қоидаларни ҳам бузишга мажбур бўлган. Балки уларни ўқиб, шу ҳам яхшилик бўпти-ю, деган хаёлга боришингиз мумкин, аммо хайр-саховатнинг, эзгуликнинг катта-кичиги бўлмайди.

Аутизм касаллигига чалинган бола қироличадан ҳам кўпроқ табрикнома олди

Аутизм хасталигидан азият чекувчи Олли Жонс туғилган кунида ўзига ўзи иккита табрик хати (откритка) тайёрлади. У ўзини бошқалар ҳам табриклаши мумкинлигини хаёлига келтирмаган эди. Фарзандининг ўзига ўзи табрик хати тайёрлаётганини кўрган онасининг унга раҳми келади ва Facebook фойдаланувчиларидан ўғлини туғилган куни билан қутлашни илтимос қилади. Аёлнинг илтимосига беэътибор бўлмаган одамлар болани табрик хатларига кўмиб ташлашади. Умумий ҳисобда, бутун дунёдан 20 000 киши уни туғилган куни билан табриклайди.

Миннатдорчилик сифатида врачларга қаҳва сотиб оладиган эркак

Бу одамнинг исми Дэн. У ҳафтанинг чоршанба ва пайшанба кунлари отаси даволанган саратонга қарши курашиш маркази ходимларига улашиш учун қаҳва сотиб олади.

Полициячилар кўзи ожиз болани ўзлари билан патрулга олиб чиқишди

Кейж Хэнкок-Стивенс полициячи бўлишни орзу қиларди, аммо кўзи ожиз бўлгани учун бу нияти армонга айланди. Унинг эзгу ниятидан хабар топган полициячилар Кейжни хурсанд қилиш мақсадида ўзлари билан бирга патрулга олиб чиқишди.

Ҳаммага текин камалак тарқатувчи қизча

Бошқа болалардан деярли фарқи бўлмаган бу кичкина қизалоқ ўзининг шахсий савдо дўконини очди. Мазкур дўконда фақатгина биттагина нарса — камалак бор, қизча камалакларини текинга тарқатади.

Буғу боласини қутқарган бангладешлик бола

Бу болакайнинг исми Билол бўлиб, у ҳақиқий қаҳрамондир. Сув тошқини натижасида чўкаётган буғу боласини кўрган Билол ўйланиб ўтирмай, ҳаётини хавф остига қўйиб, ўзини сувга отди. Ҳаммаси яхшилик билан якун топди, буғу боласи онасининг олдига қайтди, Билол эса маҳаллий қаҳрамонга айланди.

Ресторан ишчиси қарияни ёмғирдан пана қилди

Ресторандан чиққан қария машинаси томон йўл олди. Шаррос қуйиб ётган ёмғир тагида қариянинг ивиб кетиши мумкинлигини кўрган ресторан ходими уни соябон билан тўсди. Албатта, унинг ёнида ҳақиқий соябон бўлмаганлиги боис, стол устида турган улкан соябонни ечиб олишга мажбур бўлди. Балки шуниси маъқулдир?..

Онаси касалхонага ётқизилган болаларга овқат тайёрлаб берган полициячилар

Қонида қанд миқдори ошиб кетган, беш фарзанднинг онаси бўлган аёл касалхонага олиб кетилди. Шошилинч хизматнинг қўнғироғидан кейин етиб келган полициячилар болаларни ёлғиз қолдиришмади. Улар учун кечки овқат тайёрлаб, ҳаттоки идиш-товоқларни ҳам ювиб қўйишди.

Бу эркак бозорда сотилаётган тошбақаларни сотиб олади ва қайтадан денгизга қўйиб юборади

Тошбақаларни қутқарган бола

Тўрт ёшли болакай оқава сувлар зовурига тушиб қолган учта тошбақани кўриб қолди. У ота-онаси билан биргаликда қутқарув хизматини чақирди. Қутқарувчилар тошбақаларни зовурдан олиб чиққунларига қадар бола кетишни истамади. Тошбақалар яқин ўртадаги ветеринар клиникага жойлаштирилди. Яқин кунларда улар озодликка қўйиб юборилади.

Коалага оналик қилган аёл

Австралиянинг Брисбен шаҳри яқинидан кичкина коала боласи топилди. Бундай кичкина коалалар онасидан айрилса, айрилиқни кўтара олмайди, депрессияга тушиб қолади. Аммо Жулия Зайзневски коала боласи учун она вазифасини ўтади. Ҳозирда коала анча улғайиб қолган, тутинган онасининг уйида ўзини жуда эркин ҳис этади.

Даун синдромига чалинган болани қўллаб-қувватлаган байкерлар

Даун касаллигидан азият чекувчи бу боланинг исми-шарифи Шон Мерердир. Унинг ота-онаси фарзанди мактабга борса, болалар устидан кулишидан хавотирга тушиб, биринчи сентябрь арафасида Facebook фойдаланувчиларидан ёрдам сўради. Унинг илтимосига бир пайтнинг ўзида бир қанча байкерлар жавоб берди. Биринчи сентябрь куни ўнга яқин байкерлар Мерерларнинг хонадонига бориб, Шонни билимлар куни билан табриклашди ва унга атаб махсус тайёрланган шлемни совға қилишди. Ортида шундай ҳимоячилари бўлган Шонни бирорта бола хафа қилишга журъат этолмади.

Оёғи гипсланган оғмахон (хомяк)

Россиянинг Петрозаводск шаҳридаги ветеринарлик маркази врачи Мария Фирсова чўлоқланиб юрган оғмахоннинг оёғига гипс қўйди.

Польшалик спортчи бемор боланинг ҳаётини сақлаб қолиш учун медалини сотди

Рио-де-Жанейрода ўтказилган олимпиадада диск отиш спорти бўйича кумуш медални қўлга киритган польшалик Пётр Малаховский уч ёшли Олек исмли болага ёрдам бериш мақсадида кумуш медалини сотиш учун аукционга қўйди. Олек кўз тўр пардасидаги хавфли ўсма – ретинобластома касаллигидан даволанар эди. Спортчининг медалини польшалик миллиардерлар Доминик ва Себастьян Кулчиклар 126 минг долларга сотиб олди.

Лотереяда ютган пулларини муҳтожларга тарқатган эр-хотин

Канадалик Вайолет ва Аллен Ларжлар лотерея ўйнаб, 11 миллион доллар пул ютуғига эга бўлишди. Эр-хотин бу пулларни ўзларининг эҳтиёжи учун ишлатмай, муҳтожларга тарқатишга қарор қилишди. Улар 11 миллион долларни Вайолет кимётерапия курсини қабул қилган касалхонанинг онкология бўлимига, ўт ўчириш хизматига, Қизил Хоч жамиятига, Қутқарув Армиясига, Альцгеймер ва қандли диабет касаллигига чалинган беморларга тақсимлаб беришди.

Adme.ru нашри.