Америкалик поп юлдуз Мадонна Малавида яшовчи эгизак қизларни асраб олди, деб хабар берди “Ntv.ru” нашри.
Хонанда илгари ҳам Шарқий Африка республикаларидан бўлган икки нафар болани ҳам асраб олган эди. Мадонна ўзининг Инстраграм саҳифасида оила аъзоларининг сони яна иккитага кўпайганини маълум қилди ва асраб олган эгизак қизларининг фотосуратларини жойлаштирди.
“Малавилик эгизак қизларни асраб олишдаги ҳужжатларни расмийлаштириш жараёни якунига етганини расман тасдиқлайман. Бу қизалоқлар оила аъзоларимга айланганидан жудаям бахтлиман”, деди Мадонна.
Хонанда мазкур жараёнда унга ёрдам берган барчага миннатдорчилик билдирди ва журналистлардан эгизак қизларнинг ортиқча стрессиз оилага мослашиши учун ўзи ва фарзандларининг шахсий ҳаётини ҳеч бўлмаганда маълум муддат ҳурмат қилишларини, тинч қўйишларини илтимос қилди.
Америкалик хонанданинг ўғли ва қизи бор. У 2006 йилда малавилик ўғил болани ва 2009 йилда яна бир қизалоқни ҳам асраб олган эди.
