БМТ Бош котиби Антонио Гутериш халқаро ҳамжамиятни глобал иқлим ўзгариши жараёнларининг ортга қайтариб бўлмас холатига йўл қўймасликка ва бунга эришиш учун биргаликда ҳаракат қилишга чақирди.
Иқлимшунослар айни дамда Гренландияда музликлар ва қорлар рекорд кўрсаткичларда эриётгани ҳақида бонг уришмоқда. Фақатгина июль ойининг ўзида 197 млрд.тонна сув орол муз қалқонидан дунё океанига эриб тушган. Бунинг натижасида дунё океанининг сув сатҳи ярим миллиметрга қадар кўтарилди.
Сўнгги ойларда Европага кириб келган жазирама иссиқ Арктика ва Гренландияда ҳароратнинг 15- даражага кўтарилиб, кетишига сабаб бўлди. Экспертлар Шимолий муз океанида муз қатламининг минимал даражага қадар тушиб кетганини қайд этишди. Музликларнинг шиддат билан эриши, Европадаги аномал жазирама ва Сибирдаги ўрмон ёнғинлари иқлим ўзгариши жараёнларининг ёрқин исботи сифатида эътироф этилмоқда.
