Айни пайтда Россияда хизмат сафарида бўлиб турган "Ўзбеккино" Миллий агентлиги делегацияси аъзолари Москвадаги "Союзмультфильм" федераль давлат унитар корхонасига ташриф буюришди. Томонлар ҳамкорлик тўғрисида меморандум имзолаб, биргаликда Хўжа Насриддин ҳақида анимацион сериални яратишга келишиб олдилар.
"Бугунги кунда миллий анимация санъатини ривожлантиришга жиддий эътибор берилмоқда, - деди "Ўзбеккино" Бош директори Ф.Aбдуҳолиқов. - Биз жажжи томошабинларини ўзига жалб қиладиган миллий мультфильмларни кўпайтиришимиз керак. Яқинда миллий мультиқаҳрамонлар қиёфасини яратиш учун танлов эълон қилдик. Бугун “Союзмультфильм билан йўлга қўйилаётган ҳамкорлик ҳам ўз самарасини беришига ишонамиз. Хусусан, янги мультисериал қаҳрамони – Хўжа Насриддин образи нафақат болалар, балки катталарнинг ҳам қалбидан жой олади, деб умид қиламиз.
“Биз 20 йилдан бери Ўзбекистон билан ҳамкорлик қилиш имкониятини кутиб келардик. Хўжа Насриддин ҳақидаги анимацион сериални яратиш ғоясини сўзсиз қўллаб-қувватлаймиз. Чунки, бир нечта авлод шу донишманд ва хушчақчақ миллий қаҳрамон ҳақидаги латифалар, афсоналарни эшитиб улғайди, у турли халқларнинг Самарқанд, Бухоро сингари тарихий шаҳарлар ҳақидаги тасаввуридан ўрин олди”, - деди "Союзмультфильм" киностудияси бош директори Борис Машковцев.
Учрашувда Ўзбекистон Республикасининг Россия Федерациясидаги элчихонаси вакиллари ҳам иштирок этишди.
