Tashkent City Congress hall да бўлиб ўтган бугунги Халқаро пресс-клуб матбуот анжуманида Бандлик ва меҳнат муносабатлари вазири ўринбосари Эркин Мухитдинов ҳам иштирок этди.
“Даракчи” газетаси мухбири томонидан берилган саволларга вазир ўринбосари қуйидагича жавоблар берди:
- Сўнгги пайтларда хусусий бандлик агентликлари томонидан ноқонуний фаолиятлар фош этилмоқда. Ушбу агентликлар раҳбарларининг жазоланиши табиий, лекин унинг ортида қанча одам моддий ва маънавий жабр кўрмоқда. Уларнинг фаолиятини назорат қилишда вазирлик томонидан аниқ чора-тадбирлар ишлаб чиқилмаганми ёки янги тизимда тажрибасизликка йўл қўйилмоқдами? Бу саволни кўп жойларда беряпмиз ва вазирлик мутасаддилари томонидан “гуруч курмаксиз бўлмайди”, “биз тадбиркорларнинг фаолиятига аралашолмаймиз” қабилидаги “навбатчи жавоблар” берилмоқда.
- Мен сизга “навбатчи жавоб” эмас, аниқ жавоб бераман: Биз энг аввало, асосий эътиборни хорижга кетган фуқароларимизнинг ҳуқуқини ҳимоя қилишга қаратганмиз. Бу ерда тизим бор, яъни ҳар бир хусусий бандлик агентликлари бизга ҳар бир хорижга кетган фуқаролар ҳақида маълумот беришади ва биз буни назорат қилиб борамиз. Баъзи агентликлар фуқароларни хорижга жўнатмай туриб, масъулиятсизликка йўл қўйган. Очиғини айтиш керак – бунда хатоликка йўл қўйилган. Буни тўғирлаймиз. Энди хусусий бандлик агентликлари билан шартнома тузилади. Уларга мурожаат қилаётган ҳар бир фуқаро қанча маблағ тўлади, ҳолат қайси босқичда ва хорижга қачон жўнатилиши ҳақида хусусий агентликлар бизга маълумот бериб туришади. Буни тўғри талқин қилиш керак, ҳозирда фаолият юритаётган 59 та хусусий бандлик агентликларидан 8 тасида ноқонуний фаолият аниқланган. Қолган 51 та агентликлар қонун доирасида фаолият юритишмоқда.
- Демак, энди хусусий бандлик агентликларига ишонсак бўлади?
- Ҳа, бўлади...
Бироз аввал "Human" хусусий бандлик агентлиги раҳбари 10 йилга қамалганлиги ҳақида хабар берган эдик.
