Айни пайтда коронавирус инфекцияси жиддий фазага кўтарилди. Ундан вафот этганлар сони сўнгги маълумотларда айтилишича 170 нафардан ошган. Дунё бўйича касалланган инсонлар 8 мингга яқинлашмоқда. Бугунги кунда ушбу касаллик 16 та давлатда қайд этилди.
Мамлакатимизда коронавирус кириб келишининг олдини олиш мақсадида комплекс чора-тадбирлар татбиқ этилмоқда. Жумладан, Давлат чегара постларидан ўтаётган фуқароларни тиббий кўрикдан ўтказишга алоҳида эътибор қаратиляпти, деб хабар берди Соғлиқни сақлаш вазирлиги жамоатчилик билан алоқалар бўлими.
Айтилишича давлат чегараларининг кесишиш жойларида 52 та санитария-карантин пунктлари ишламоқда. Ҳозирда чегара постларидан ўтаётган фуқароларнинг тепловизор ёрдамида тана ҳарорати масофадан туриб ўлчанмоқда. Ушбу тадбирларни амалга ошириш учун нафақат санитария назорат пунктлари, балки шифокор инфекционистлар ҳам жалб этилган.
Сўнгги ўн куни ичида ана шундай текширувлар натижасида Хитойдан келган фуқароларнинг 59 нафаридан вирусологик текширув ўтказиш учун намуналар олинган. 19 нафар шахс эса Вирусология илмий текшириш институти клиникасида ташкил этилган бўлимга мурожаат этган ва тиббий назоратдан ўтган. Шу ўринда айтиш керакки, айни пайтда уларнинг биронтасида ҳам коронавирус инфекцияси аниқланмаган.
Бундан ташқари, Хитойдан келганлар 14 кун давомида назоратга олинмоқда.
