Коронавирус пандемияси туфайли дунёда ишсизлик оммавий тус олиши мумкин. БМТ таркибидаги Халқаро меҳнат ташкилотининг хабарига кўра, бунинг оқибатида деярли 25 миллион киши ишсиз қолади.
Халқаро меҳнат ташкилоти (МОТ) қайд этилишича, пессимистик сценарий бўйича 24,7 миллион киши (солиштириш учун: 2008-2009 йилдаги молиявий инқироз даврида 22 миллион ходим ишсиз қолган), оптимистик тахмин бўйича эса 5,3 миллион киши ишсиз қолади.
“Коронавирус пандемияси эндиликда дунёга нафақат соғлиқни сақлаш соҳасидаги глобал инқироз, балки меҳнат бозорида ҳам катта таъсир кўрсатадиган иқтисодий инқирозга олиб келади. Бунга тайёр бўлиш керак“ деди Халқаро меҳнат ташкилоти бош директори Гай Райдер.
