Washington Post газетасининг ёзишича, июнь ойининг бошида АҚШнинг 14 та штатида коронавирус юқтириш ҳолатлари яна ошиб кетган.
Сўнгги ҳафтада Аляска, Аризона, Арканзас, Техас, Калифорния, Шимолий Каролина, Жанубий Каролина, Флорида, Кентукки, Нью-Мексико, Миссисипи, Орегон, Теннесси ва Юта штатларида коронавирус тарқалиши яна кучайган.
Бунга сабаб сифатида АҚШнинг қишлоқ жойларида ҳам касалликка чалиниш ҳолатлари кўпайгани айтилмоқда. Ҳолбуки, инфекциянинг «биринчи тўлқинига» Ню-Ёрк ва Чикаго каби аҳоли кўп бўлган шаҳарлар дуч келганди.
Бундан аввал АҚШ касалликларнинг олдини олиш ва назорат қилиш маркази (CDC) Жорж Флойднинг ўлими туфайли юз берган оммавий норозилик чиқишларидан кейин вазиятни диққат билан кузатиб бораётганини маълум қилганди. Зеро, шифокорларни оммавий намойишлар COVID-19 бўйича олиб борилаётган статистикага қандай таъсир этиши қизиқтирмоқда.
Хопкинс институти маълумотига кўра, АҚШда коронавирус юқтириш билан боғлиқ 1,96 миллионта ҳолат рўйхатга олинган, пандемиядан вафот этганлар сони 112 минг кишига етди.
