Франция Президенти Эмманюэль Макрон мамлакатда коронавирус эпидемияси устидан ғалаба қозонилганини маълум қилди. Бу ҳақда расмий манбалар асосида Лента.ру хабар берди.
Хабарда айтилишича президент Майотта ҳамда Гвианадан ташқари барча ҳудудлар “яшил”, яъни коронавирусдан холи дея эълон қилган. Мамлакат раҳбари таъкидлаганидек францияда ресторан, кафе ва барлар ҳам ўз фаолиятини қайта тиклайди, давлат чегаралари ҳам очилиши айтилмоқда.
Мактабларда анъанавий таълим жараёни эса 22 июндан бошланади.
“Аммо бу вирус йўқолганини билдирмайди. Биз у билан узоқ вақт кўникиб яшашга мажбурмиз. Эпидемияга қарши кураш ҳали тугагани йўқ. Аммо мен вирус устидан биринчи ғалабани қўлга киритганимиздан мамнунман”, деган президент.
Макроннинг таъкидлашича, ҳозирги кунда асосий эътибор мамлакат иқтисодиётини қайта тиклашга қаратилмоқда.
Маълумотларга кўра, Францияда коронавирус инфекциясини 152 460 киши юқтириб олган ва шундан 29 335 нафари ҳаётдан кўз юмган.
