Xorazmda oilaviy bolalar uyi rahbari uch nafar voyaga etmagan tarbiyalanuvchini 10 oy davomida viloyat adliya boshqarmasi va tuman favqulodda vaziyatlar bo`limi boshliqlari bilan jinsiy aloqada bo`lishga majburlagani haqida xabar berilgandi.
2023 yilning 3 noyabr kuni Xorazmdagi etimxona qizlariga nisbatan jinsiy zo`rovonlik sodir qilgan A. Masharipov va A. Kuryazovning 3 yilga ozodlikdan mahrum qilingani haqida birifingda Bosh prokuror o`rinbosari S. Artikova va Oliy sud raisi o`rinbosari I. Muslimovlar ma`lum qilgan.
Ammo O`zbekiston inson huquqlari Ezgulik jamiyati raisi Abdurahmon Tashanovning ijtimoiy tarmog`iga joylangan postdan pedofillar jazoni o`tash uchun qamoqqa emas, manzil koloniyaga yuborilgani ayon bo`ldi.
"O`shanda huquq tizimimizning kattalari bir "kichkinagina" epizodni yashirib ketishgan ekan. Ya`ni, pedofillar jazoni o`tash uchun qamoqqa emas, manzil koloniyaga yuborilgan ekan. Boz ustiga ularning dastlabki suddan beri uylarida o`tkazgan vaqtlari jazo muddatidan chegirib tashlangan ekan.
Qozilarimiz shu qadar ayyor ekanki, jamoatchilikni "pedofillar uzil-kesil 3 yil qamoqda o`tiradi" degan gapga ishontirishgan ekan. Aslida esa ular bor-yo`g`i 2 yildan ko`proq manzil koloniyada o`tirishadi, u erdagi barcha shart-sharoitlardan foydalanishadi.
Biz bekorga shuncha baqir-chaqir qilibmiz. Pedofillar, pedofiliya jinoyatlari haqida gapirgan vaqtizimini ilm olishga sarflaganimizda, "sulton suyagini xorlamas", "qarg`a qarg`aning ko`zini cho`qimas" degan naqllarning mag`zini chaqqan bo`lardik.
Hukm qo`limda, ammo undagi tafsilotlarni e`lon qila olmayman, chunki sud yopiq bo`lgan. Agar ma`lumotlarni oshkor qilsam, qonun menga qarshi ishlaydi, chunki men Adliyada ishlamayman...", deydi huquqshunos.
Bugun ushbu xabar yana keng muhokamalar maydoniga chiqdi.
Xususan, Rasul Kusherbaev, "Hatto er-xotin munosabatida ayolga nisbatan zo`ravonlikni targ`ib qilganlik uchun faollar 15 sutkadan ham qamalayapti, ammo amaldorlar pedofillik qilsa, yosh qizlarni zo`rlasa ham ularga maksimal engillik berish, shart-sharoit yaratish yo`lidan borilmoqda. Xorazmdagi sobiq adliya boshlig`i bilan bog`liq holat bunga yaqqol misol", deydi.
Kusherbaev, jamoatchilikka ular qamaldi, deya bayonot bergan Bosh prokuror o`rinbosari va Oliy sud raisi o`rinbosarini pedofillarning manzil koloniyaga joylashib, yaxshi sharoitda jazo o`tashayotganini jamoatchilikdan yashirganlikda aybladi. Jazoning engilligi jamiyatda pedofillikni avj olishiga sabab bo`lishini ta`kidlaydi.
