Davlat xizmatini rivojlantirish agentligi huzurida Rahbar kadrlarni baholash markazi tashkil etildi. Bu Vazirlar Mahkamasining 4 oktyabrdagi qarorida nazarda tutilgan.
Markazning asosiy vazifalari quyidagilardan iborat:
- ijtimoiy-psixologik tadqiqotlar asosida davlat fuqarolik xizmatchilari uchun bazaviy, alohida lavozim yoki lavozimlar guruhi uchun kompetensiyalar modeli hamda indikatorlarini ishlab chiqish;
- davlat fuqarolik xizmatchilarini shaxsiy-professional diagnostika qilish, kompetensiyalar modeli asosida kompleks baholash;
- kompetensiyalarni baholash jarayonida foydalanish uchun doimiy ravishda yangi uslublarni ishlab chiqish, o‘zlashtirish va joriy qilish;
- kompetensiyalarni baholash natijalari asosida rahbar kadrlar uchun shaxsiy-professional rivojlanish trayektoriyasini ishlab chiqish va zamonaviy texnologiyalardan foydalangan holda amalga oshirish;
- rahbarlik lavozimiga nomzodlarning umumiy kasbiy bilimi, qadriyatlari va aqliy salohiyatini aniqlash bo‘yicha test sinovlarini hamda psixologik so‘rovnomalar o‘tkazish;
- rahbar kadrlar faoliyati samaradorligini baholash va monitoring qilish, kadrlarga bo‘lgan ehtiyojni prognoz qilish, ularni saralab olish va joy-joyiga qo‘yish jarayonlariga raqamli texnologiyalarni va zamonaviy usullarni keng joriy etish.
Markaz Davlat xizmatini rivojlantirishni qo‘llab-quvvatlash jamg‘armasi mablag‘lari, shartnoma asosida xizmatlar ko‘rsatishdan tushadigan tushumlar, xalqaro moliya institutlari va xorijiy hukumat moliya tashkilotlarining grantlari va texnik ko‘maklari, jismoniy va yuridik shaxslarning homiylik xayriyalari hisobidan moliyalashtiriladi.
Tashkilotga o‘z faoliyatini samarali amalga oshirishi uchun tegishli soha bo‘yicha malakali mutaxassislar va ekspertlarni, jumladan, xorijiy ekspertlarni belgilangan tartibda to‘g‘ridan to‘g‘ri shartnoma asosida jalb qilish, shuningdek, faoliyatining asosiy yo‘nalishlari doirasida daromad keltiradigan faoliyat bilan shug‘ullanish, davlat fuqarolik xizmatida zamonaviy raqamli texnologiyalarni joriy etish bo‘yicha axborot dasturlarini ishlab chiqish huquqi berilgan.
Markaz Toshkent shahri Chilonzor tumani Islom Karimov ko‘chasi 55-uy manzilidagi binoning birinchi qavatida joylashgan.
