Bugun Toshkent shahar sudi jinoyat ishlari bo‘yicha sudlov hay’atining apellyatsiya instansiyasida G‘. Dustovning advokatlari tomonidan birinchi instansiya sudining qarori ustidan berilgan apellyatsiya shikoyatlari sudya F. Ergashev raisligida ko‘rib chiqilgani xabar berilgan edi.
Toshkent shahar sudlarining xabar berishicha, apellyatsiya sudida G‘. Dustovning mayda bezorilik sodir etgani tasdiqlanib, birinchi instansiya sudi tomonidan uning harakati to‘g‘ri kvalifikatsiya qilingan deb topildi.
Shuningdek, sud G‘. Dustov avval ham (1 yil mobaynida) aynan shu turdagi huquqbuzarligi uchun ma’muriy javobgarlikka tortilganligi sababli advokatlarning G‘. Dustovga yarashuvga bo‘lgan huquqini tushuntirmaganligi haqidagi vajlari bilan kelishmagan
"Toshkent shahar sudi jinoyat ishlari bo‘yicha sudlov hay’ati apellyatsiya instansiyasining 2025 yil 3 yanvardagi ajrimiga muvofiq G‘. Dustovga nisbatan jinoyat ishlari bo‘yicha Bektemir tuman sudi tomonidan chiqarilgan qaror o‘zgartirilib, huquqbuzarning pushaymonligi, sog‘lig‘i hamda mahalla yettiligining unga yengillik berishni so‘rab kafillik bildirilganligi inobatga olingan holda unga tayinlangan 15 sutka ma’muriy qamoq jazosi 8 sutka ma’muriy qamoq jazosiga keltirildi
Bugungi kun holatiga G‘. Dustov jazoni to‘liq o‘taganligi bois sud zalidan ma’muriy qamoqdan ozod qilindi.
Advokatlarning apellyatsiya shikoyatlari qisman qanoatlantirildi.
Toshkent shahar sudining apellyatsiya instansiyasi qarori ustidan taraflar qonunda belgilangan tartib va muddatda Oliy sudning jinoyat ishlari bo‘yicha sudlov hay’atiga taftish tartibida shikoyat berishi, prokuror esa protest keltirishga haqliligi ma’lum qilinadi", deyiladi xabarda.
