Oliy Majlis Senatining oltinchi yalpi majlisi 2025 yil 29 aprel kuni chaqiriladi. Senat Kengashi joriy yilning 28 aprel kuni bo‘lib o‘tgan navbatdagi majlisda bu haqda qaror qabul qildi.
Yalpi majlisda mamlakat iqtisodi, ijtimoiy himoya, ekologik barqarorlik, sog‘liqni saqlash, mudofaa va sud-huquq tizimini takomillashtirishga qaratilgan qator qonunlar muhokama qilinadi.
Shulardan ayrimlari:
“Banklarni sanatsiya qilish va tugatish to‘g‘risida”gi Qonun: moliya bozorini sog‘lomlashtirish va banklarning faoliyatini barqarorlashtirishga qaratilgan.
“Issiqxona gazlarining chiqarilishini cheklash to‘g‘risida”gi Qonun: ekologik barqarorlikni ta’minlash, uglerod birliklari muomalasi va issiqxona gazlari chiqarilishini nazorat qilishga qaratilgan.
“Davlat mudofaa buyurtmasi to‘g‘risida”gi Qonun: milliy mudofaa va xavfsizlikni mustahkamlash, davlat mudofaa buyurtmalarini shakllantirish va bajarish tartibini belgilash.
Shuningdek, ijtimoiy xizmatlar, sud hujjatlari ijrosi, tamaki va nikotin mahsulotlari muomalasini tartibga solish kabi masalalar ham muhokama qilinadi. Yangi qonunlar aholini zararli odatlardan muhofaza qilish va davlat xavfsizligini mustahkamlashga xizmat qiladi.
Majlisda O‘zbekiston va Ozarbayjon o‘rtasida ittifoqchilik munosabatlari to‘g‘risidagi Shartnomani ratifikatsiya qilish va qishloq xo‘jaligini rivojlantirish haqida ham qarorlar qabul qilinishi kutilmoqda.
