Turkiya Respublikasining O‘zbekistondagi maktabiga bino qurish uchun yer ajratib berildi. Bu haqdagi qaror Toshkent shahar hokimi Shavkat Umurzoqov tomonidan joriy yilning 5 iyun kuni imzolangan.
Qarorda qayd etilishicha, Turkiya Respublikasi elchixonasi qoshida maktab binosi qurilishi uchun Toshkent shahri, Shayxontohur tumani, Kohota MFY hududida joylashgan aholi punktlari yerlaridan maydoni 0,31 gektarli yer uchastkasi (chegara rejasiga muvofiq) O‘zbekiston Respublikasi Maktabgacha va maktab ta’limi vazirligiga doimiy foydalanishga ajratib beriladi.
Hujjatda urg‘ulanishicha, agar Yer kodeksining 36-moddasida ko‘rsatib o‘tilgan holatlar yuzaga kelganda, ushbu qaror belgilangan tartibda bekor qilinishi ham mumkin.
Eslatib o‘tamiz, joriy yilning 6 fevral kuni Turkiyaning o‘sha vaqtdagi O‘zbekistondagi elchisi Olgan Bekar Toshkent shahar hokimi Shavkat Umurzoqov bilan uchrashgandi. Elchi qabul uchun Umurzoqovga minnatdorlik bildirib, O‘zbekistondagi diplomatik missiyasi yakuniga yetayotganini ma’lum qilgan hamda avval muhokama qilingan masalalar – Turk maktabini kengaytirish, Turkiyaning birinchi prezidenti Mustafo Kamol Otaturk nomini Toshkent ko‘chalaridan biriga berish hamda Toshkent shahrida Turk bog‘ini tashkil etish bo‘yicha o‘z mulohazalarini bildirgan.
Ma’lumot uchun, O‘zbekistonda turk maktabi 1993 yilda tashkil etilgan. 1998 yilda esa akademik litsey o‘z faoliyatini boshlagan. Unda faqat Turkiya fuqaroligiga ega oilalarning farzandlari Turkiya milliy ta’lim vazirligi tomonidan belgilab berilgan dastur asosida o‘qitiladi.
