Turkiyada firibgarlik va odam savdosi jinoyatlarida gumon qilinib, 6 yildan buyon qidiruvda bo'lgan O'zbekiston fuqarolari qo'lga olinib, mamlakatga qaytarildi. Bu haqda Bu haqda Ichki ishlar vazirligi xabar berdi.
Ma'lum qilinishicha, ayol O'zbekistonda firibgarlik jinoyatini sodir etib, 6 yildan buyon qidiruvda bo'lgan. U O'zbekiston va Turkiya Ichki ishlar vazirliklari hamkorligida o'tkazilgan tezkor-qidiruv tadbirlari natijasida Turkiyada ushlanib, O'zbekistonga olib kelingan.
U fuqarolarga xorijiy davlatlarga ishga joylashtirish bo'yicha litsenziyasiz faoliyat yuritib, ularni AQSh va Yevropa davlatlarida yuqori maoshli ish bilan ta'minlashni va'da qilgan hamda ishonchga kirib, katta miqdordagi pullarni firibgarlik yo'li bilan qo'lga kiritgani aytilgan.
Mazkur holat bo'yicha unga nisbatan Jinoyat kodeksining 168-moddasi (firibgarlik) bilan jinoyat ishi qo'zg'atilgan.
Shuningdek, 135-modda (odam savdosi) bo'yicha jinoyat sodir etib, qochib yurgan yana bir shaxs ham ushlanib, O'zbekistonga qaytarilgan.
Rasmiylarga ko'ra, O'zbekiston va Turkiya huquqni muhofaza qiluvchi organlari hamkorligida yana bir qator qidiruvdagi shaxslarni aniqlash va ushlash bo'yicha ishlar davom ettirilmoqda.
