Туркияда фирибгарлик ва одам савдоси жиноятларида гумон қилиниб, 6 йилдан буён қидирувда бўлган Ўзбекистон фуқаролари қўлга олиниб, мамлакатга қайтарилди. Бу ҳақда Бу ҳақда Ички ишлар вазирлиги хабар берди.
Маълум қилинишича, аёл Ўзбекистонда фирибгарлик жиноятини содир этиб, 6 йилдан буён қидирувда бўлган. У Ўзбекистон ва Туркия Ички ишлар вазирликлари ҳамкорлигида ўтказилган тезкор-қидирув тадбирлари натижасида Туркияда ушланиб, Ўзбекистонга олиб келинган.
У фуқароларга хорижий давлатларга ишга жойлаштириш бўйича лицензиясиз фаолият юритиб, уларни АҚШ ва Европа давлатларида юқори маошли иш билан таъминлашни ваъда қилган ҳамда ишончга кириб, катта миқдордаги пулларни фирибгарлик йўли билан қўлга киритгани айтилган.
Мазкур ҳолат бўйича унга нисбатан Жиноят кодексининг 168-моддаси (фирибгарлик) билан жиноят иши қўзғатилган.
Шунингдек, 135-модда (одам савдоси) бўйича жиноят содир этиб, қочиб юрган яна бир шахс ҳам ушланиб, Ўзбекистонга қайтарилган.
Расмийларга кўра, Ўзбекистон ва Туркия ҳуқуқни муҳофаза қилувчи органлари ҳамкорлигида яна бир қатор қидирувдаги шахсларни аниқлаш ва ушлаш бўйича ишлар давом эттирилмоқда.
