Surxondaryo viloyati Denov tumanida ichki ishlar organlari xodimi voyaga etmagan qizning nomusiga tegishda gumon qilinmoqda. Bu haqda 7 iyun kuni viloyat prokuraturasi xabar berdi.
Ma'lum qilinishicha, Denov tumani Ichki ishlar bo'limi Jamoat xavfsizligi xizmati huquqbuzarliklar profilaktikasi bo'limida voyaga etmaganlar masalalari bo'yicha inspektor-psixolog lavozimida faoliyat yuritgan A.R.ga nisbatan jinoyat ishi tergovi yakunlangan.
Unga nisbatan O'zbekiston Respublikasi Jinoyat kodeksining 118-moddasi 4-qismi (14 yoshga to'lmagan shaxsning nomusiga tegish), 129-moddasi 3-qismi (zo'rlik ishlatib yoki qo'rqitib 16 yoshga to'lmagan shaxsga nisbatan uyatsiz-buzuq harakatlar qilish) hamda 206-moddasi 1-qismi (hokimiyat yoki mansab vakolati doirasidan chetga chiqish) bilan ayblov xulosasi tuzilgan va ish ko'rib chiqish uchun sudga yuborilgan.
Hozircha voqea aynan qachon sodir bo'lgani rasman ma'lum qilinmagan.
