Samarqand viloyati Payariq tumanida yashovchi Anora Olimova bolalar kiyimini sotish bilan shug`ullanardi. Topgan-tutgani oilasiga etardi, biroq ayol bundanda ko`pini istadi.
Avvaliga u yangasi Munira Salomovadan 200 AQSh dollari oldi. Buning hisobidan Anora biznesini kengaytiradi, biroq bu ham unga kamlik qildi.
Keyingi safar u yangasidan 2 ming “ko`kidan” qarzga oladi va pullarni uch oydan so`ng foizi bilan qaytarishiga qarindoshini ishontiradi.
Biroq, qarzni qaytarish muddati tezda keldi. Munira har kuni undan pullarni qaytarishini talab qildi.
Anora qanday qilib “kreditor”dan qutulish yo`llarini izlay boshladi va bir kuni o`zi bilan metal bo`lagini olib Muniraning uyiga bordi.
Yangasi qarzni olib keldi, deb o`ylab bahri-dili ochilib ketdi. Biroq bunday emasligini bilgach, uni urisha ketdi.
Anora qulay paytni poylab metal bilan ayol boshiga o`rdi. Munira yiqilib tushganini ko`rib, qochib ketdi.
Shifokorlar 3 kun davomida jarohatlangan ayolning hayotini saqlab qolishga urinishdi. Biroq Munira vafot etdi.
"Zarafshon" nashrining xabariga ko`ra, Anora Olimova Samarqand viloyati Jinoiy ishlar bo`yicha sudi qarori bilan 13 yilga ozodlikdan mahrum etildi.