Латвия, Литва ва Эстония Ташқи ишлар вазирликлари «ўз шахсий ҳаракатлари билан президентлик сайлови натижаларини сохталаштиришни уюштирган ва тинч намойишларни зўравонлик билан бостиришни қўллаб-қувватлаган» беларуслик мансабдор шахсларга нисбатан санкциялар жорий қилинганини маълум қилди. Бу ҳақда Meduza хабарига таяниб Дарё ёзмоқда.
Александр Лукашенко бошчилигидаги 30 кишига номаълум муддатга persona non grata мақоми берилган. Шунингдек, рўйхатга Беларусь президенти аппарати ва маъмурияти, мамлакат Марказий сайлов комиссияси, Ички ишлар ва Адлия вазирликлари, Бош прокуратура, Тергов қўмитаси, Давлат хавфсизлик қўмитаси, Хавфсизлик кенгаши ва бошқа идоралар вакиллари киритилган.
Латвия, Литва ва Эстония Европа Иттифоқини зудлик билан беларуслик мансабдорларга нисбатан худди шундай чоралар қўллашга чақирган.
Аввалроқ Европа парламенти Лукашенкога persona non grata мақомини берганди ва Москвадан Беларусь ишларига аралашмасликни сўраганди.
Эслатиб ўтамиз, Беларусда 9 август куни президент сайлови бўлиб ўтди. Сайлов куни Минск марказига ҳарбий техникалар олиб чиқилди. Беларусь милицияси сайлов участкалари олдида тўпланган одамларни қўлга олди. Сайлов куни оқшомида мамлакатнинг барча етакчи оммавий ахборот воситаларининг сайтлари ишламай қолди. Минскда президент сайловидан кейин норозилик намойишлари бошланган.
