Наманганда қиз бола икки нафар эркакни дўппослагани ҳақидаги видео ижтимоий тармоқларга тарқалган эди. Бу воқеа қандай юз бергани барчага қизиқ бўлди. Расмий манбалар хабар беришича қиз ўз шаънини ҳимоя қилган.
Наманганда икки эркакни дўппослаган Гулсанам Алижоновага нисбатан жиноят иши тугатилди, дея хабар бермоқда «Дарё» мухбири Азизбек Абдувалиев.
Ёшлар ишлари агентлиги вилоят бошқармаси вакилларининг маълум қилишича, Гулсанам Алижонованинг жиноят иши юзасидан вилоят прокуратурасига жазони енгиллаштириш бўйича амалий ёрдам сўраб мурожаат этилган.
Шунингдек, Ёшлар иттифоқи Норин туман кенгаши Гулсанамнинг жамоат ишларида фаоллиги, 2019 йилдан буён волонтёр сифатида фаолият юритиши ва спортдаги ютуқларини инобатга олиб, қайта жиноят содир этмаслиги бўйича кафилликка олган.
Норин туман ИИБ мутасаддиларига кўра, ЖПКнинг 84-моддаси, 5-қисми, 2-бандига асосан, Гулсанам Алижонованинг муқаддам судланмаганлиги, қилган ишидан пушаймонлиги, жабрланувчиларнинг даъвоси йўқлиги, содир этган ҳаракати унча оғир бўлмаган жиноятлар турига кириши, шунингдек, Ёшлар иттифоқи кафиллигини инобатга олиб, айблилик тўғрисидаги масалани ҳал қилмай туриб, жиноят ишини тугатиш тўғрисида қарор қабул қилинган.
Эслатиб ўтамиз, олдинроқ Гулсанам Алижоновага нисбатан Жиноят кодексининг 277-моддаси 3-қисми «г» банди (жамоат тартибини сақлаш вазифасини бажариб турган ҳокимият вакили ёки жамоатчилик вакилига ёхуд безорилик ҳаракатларининг олдини олиш чорасини кўрган бошқа фуқароларга қаршилик кўрсатиб содир этилган безорилик) билан жиноят иши қўзғатилганди.
Унинг ўзи опасини кузатишга чиққанида футболка ва шортикда бўлгани учун масхара қилган йигитларга жавоб қайтаргани ва шаънини ҳимоя қилганини билдирганди.
