Криштиану Роналду ва Жоржина Родригеснинг тўйи бўлиши ҳақида тарқалган хабарлар Мадейрада кутилмаган ҳолатга сабаб бўлди. 8 август куни футболчининг минглаб мухлислари машҳур жуфтликнинг тўйини кўриш мақсадида Фуншал собори олдига йиғилди. Бироқ улар бошқа жуфтликнинг тўйига келиб қолгани маълум бўлди. Бу ҳақда хорижий ОАВ хабар берди.
Ижтимоий тармоқлар ва айрим ОАВда Роналду ҳамда Жоржина Родригеснинг Мадейрада никоҳдан ўтиши ҳақида хабарлар тарқалган. Шу сабабли Фуншал собори олдига 2 минг нафарга яқин мухлис ва томошабин тўпланган.
Кўпчилик Роналду ва Жоржинани кутаётган бир пайтда собор олдига эски "Rolls-Royce" келган. Машинадан тушган келинни мухлислар Жоржина Родригес деб ўйлаган.
Айрим мухлислар футболчининг 7-рақамли футболкасида бўлган, бошқалари эса Роналду сурати туширилган ниқоб таққан. Келинни кўрган меҳмонлардан бири эса оломонни тинчлантириб, "Бу Жоржина эмас", деб тушунтиришга уринган.
Кейинчалик мазкур соборда Португалия фуқаролари Фабио Рамос ва Фатима Николь Кунья Тейшейранинг никоҳ маросими бўlayotgani маълум бўлган. Жуфтлик Мадейрада туғилган, аммо Францияда яшайди. Уларнинг яқинлари ва дўстлари тўй маросимига кириш учун собор олдида тўпланган оломон орасидан ўтишга мажбур бўлган.
Маросимни ўтказган руҳоний Маркос Гонсалвеш ҳам бу тўйнинг Криштиану Роналду ва Жоржина Родригесга ҳеч қандай алоқаси йўқлигини тасдиқлаган.
Шунга қарамай, Роналду мухлислари тўй маросимига жиддий халақит бермаган. Келин ва куёв ўз никоҳ маросимини ўтказган.
Аввалроқ Роналду ва Жоржинанинг 2026 йилда, Жаҳон чемпионатидан кейин никоҳдан ўтиши ҳақида хабарлар тарқалган эди. Бироқ жуфтлик ҳозиргача тўйнинг аниқ санаси ва ўтказиладиган жойини расман эълон қилмаган.
