БМТнинг хабар беришича, Шарқий Суданда июль ойидан бери юз бераётган вайронкор сув тошқинлари 600 мингдан ортиқ одамнинг ўз уйларини ташлаб кетишига мажбур қилди. Шарқий Суданда бир неча ойлик кучли ёмғирлардан кейин Нил дарёси ўзанидан тошиб чиққанди.
Шарқий Африкада жойлашган Шарқий Судан давлати сув тошқинларидан олдин ҳам озиқ-овқат етишмовчилигидан азият чекаётганди. Шунингдек, айни пайтда бу мамлакат беш йил давом этган фуқаролар урушидан кейин тикланишда ҳам қийинчиликларга дуч келмоқда.
Бундан ташқари коронавирус пандемияси ҳам Судан учун катта бош оғриғи бўлмоқда.БМТнинг гуманитар ёрдам бўйича Шарқий Судандаги координатори Алайн Нудеҳоунинг айтишича,коронавирус сабаб бу ерга гуманитар ёрдам етказиб бериш нархлари кўтарилди,шунингдек,ёрдам берадиган гуруҳ аъзоларини ҳимоялашга эҳтиёж туғилди.
“Сув тошқинлари сабаб одамлар баландроқ бўлган ерга қочишга мажбур бўлишди, лекин, бу ерда баландроқ бўлган ҳудудлар кўп эмас” деди Нудеҳуо пайшанба куни сув тошқинларидан зарар кўрган жойларга қилган ташрифи чоғида. Унинг сўзларига кўра, БМТ тошқинлардан жабр кўрганларга ёрдам бериш учун 10 милллион АҚШ доллари ажратган. Лекин, йил охиригача яна 40 миллион доллар маблағ керак бўлади.
“Сувнинг баландлиги танамнинг деярли ярмига етди. Мен ва невараларим учун ҳеч қандай бошпана қолмади. Бизнинг подамиз ўлди ва биз дарахт тагида тунамоқдамиз” дейди Дорок қишлоғида яшайдиган 70 ёшли Кок Манёк сувни кечиб ўтар экан.
Маълумот учун, Шарқий Судан 2011 йилда Судандан ажраб чиқиб, мустақил мамлакатга айланган. Лекин, мустақилликдан икки йил ўтиб бу ерда фуқаролар уруши бошланди. Бу уруш 2018 йилда лидер партиялар ўртасида тузилган тинчлик шартномасидан кейин тугади. Аммо, ҳамма ҳарбий гуруҳлар ҳам ушбу келишувни имзоламаган. Шунинг учун Шарқий Суданда ҳамон кичик тўқнашувлар давом этмоқда.
