Австралия терма жамоаси футболчилари 2026 йилги Жаҳон чемпионатида иштирок этганликлари учун белгиланган мукофот пулини ҳанузгача олмаган. Бу ҳақда "Australian Associated Press" ахборот агентлиги хабар берди.
Маълум қилинишича, мусобақа якунланганидан кейин икки ҳафта ичида футболчиларнинг ҳисоб рақамларига пул ўтказилиши керак эди. Белгиланган тартибга кўра, ҳар бир футболчига Жаҳон чемпионатидаги учрашувларда асосий таркибда майдонга тушгани ёки захирада қолганидан қатъи назар, ҳар бир ўйин учун тахминан 6 минг Австралия доллари (4,1 минг АҚШ доллари) тўланиши лозим бўлган.
Мексика ва Швейцарияга қарши ўтказилган иккита ўртоқлик учрашуви ҳамда Жаҳон чемпионатидаги тўртта баҳсни ҳисобга олганда, терма жамоа таркибига киритилган футболчиларнинг ҳар бирига жами 36 минг Австралия доллари (24,8 минг АҚШ доллари) берилиши керак эди.
"Football Australia" ташкилоти тўловлар кечикишини Шимолий Америкадаги солиқ мажбуриятларини аниқлаштириш зарурати билан изоҳлаган. Ташкилот маблағларни ўтказишга тайёрлигини билдирган, бироқ солиқ мутахассисларининг якуний хулосаси ва Австралия футболчилар ассоциациясидан маблағларни тақсимлаш бўйича қўшимча маълумотларни кутмоқда.
Ассоциация президенти Бо Буш эса юзага келган вазиятни қабул қилиб бўлмаслигини айтган. Унинг таъкидлашича, халқаро солиқ масалаларини мусобақа бошланишидан анча олдин прогноз қилиш ва ҳал этиш мумкин эди.
Қайд этилишича, футболчилар жорий йилнинг сентябрь ойида Бразилияга қарши ўтказилган ўртоқлик учрашувлари учун белгиланган мукофот пулларини тўлиқ олган.
