Ўзбекистонлик ҳужумчи Элдор Шомуродовнинг “Ростов”дан А Серия вакили “Женоа”га кўчиб ўтиши Россия премьер-лигасининг энг шов-шувли трансфери сифатида эътироф этилмоқда., дейилади sports.uz сайтида.
Унда Элдорни қўлга киритиш учун “Женоа”, “Верона” ва “Фиорентина” каби клублари ўзаро рақобатлашгани, умуман олганда, ҳамюртимизнинг Италиядан таклиф олгани кутилмаган ҳолат бўлгани айтилган.
Чунки, ўтган йилги мавсумда Шомуродовга асосан Ла Лигадан “Сельта”, Бундеслигадан “Штутгарт” ва “Шальке” каби жамоалардан қизиқиш ва мурожаатлар бўлган. Шунинг учун кўпчилик Элдорни Германияга кетишини кутган.
Бирдан “Женоа” варианти пайдо бўлди. Генуяликларнинг расмий чорлови овоза бўлганидан кейин “Верона” ва “Фиорентина” рақобатга киришган. “Женоа” таклиф шартларини яхшилаб, “Ростов” розилигини олишга эришган.
Ўзбек футболи тарбияланувчилари Италия футболи учун нотаниш эмас. Бундан қарийб йигирма йиллар муқаддам Илёс Зейтуллаев “Ювентус” академиясида таҳсил олиб, катта жамоа таркибида ҳам муайян учрашувларда майдонга тушган ва кейинчалик бу юртнинг ўнга яқин жамоаларида тўп тепган эди. Фарқи шундаки, Илёс Италияга жуда ёш бориб қолган. Элдор Шомуродов эса, маҳоратли ҳужумчи сифатида таклиф олди, дейилади шарҳда.
“Женоа” клубида кутилмаганда коронавирус тарқагани боис, Элдор Шомуродовни жамоада кутиб олиш маросимини анъанага мувофиқ ва кўнгилдагидек ташкил этиш имкони бўлмаган. Асосий таркибнинг 20 нафарга яқин футболчиси вирус юқтиргани учун карантинда ва шифокорлар назоратида эканлиги айтилмоқда.
Элдорнинг ўзи тўрт йиллик шартномага имзо чеккан ва “Женоа” футболчиси сифатида таништирилгани ҳақидаги видеолавҳалар ҳам тарқалди.
Айни пайтда “Женоа”даги илк машғулотини кутаётган ҳамюртимиз журналистларга интервью бериб, илк таассуротлари билан ўртоқлашган:
- Ҳаммаси жуда тез содир бўлди. Ҳозир шу ерга келганимдан жуда хурсандман. Дунёнинг энг кучли лигаларидан бирида ўйнаш азалий орзуларимдан бири эди. Мени тўғри тушуниб, кетишимга рухсат бергани учун “Ростов” раҳбариятидан миннатдорман. Орзуларим рўёбга чиқмоқда.
- Ўз олдингизга қандай мақсад қўйгансиз? Бу мавсумда Криштиану Роналдудан кўп гол уришни истайсизми?
- Катта гапирмайман. Оддий қилиб айтганда, қўлимдан келган барча нарсани амалга оширишга ҳаракат қиламан!
Маълум қилинишича, Элдор Шомуродов “Женоа”да 9-рақамда тўп суради. Ҳамюртимиз А Сериядаги дебютини 19 октябрь куни “Верона” жамоасига қарши ўтказади. А Сериянинг тўртинчи туридан ўрин олган учрашувга Верона шаҳридаги 45 минг кишилик "Стадио Марк-Антонио Бентегоди" стадиони мезбонлик қилади.
