АҚШ Президенти Дональд Трамп ва демократлардан рақиби Жо Байден ўртасидаги сўнгги мунозаралар пайшанба куни бўлиб ўтди. Ундаги асосий мавзу, албатта пандемия масаласи бўлди. Бу ҳақда Узрепорт хабар берди.
Трамп аввалги мунозараларга қараганда бироз ўзини босиб туришга ҳаракат қилди, эҳтиросларини кўрсатмади. Шу билан бирга у Байден ва унинг оиласига нисбатан коррупция айбловларини илгари сурмоқда.
"Инсонларнинг ўлими учун жавобгар бўлган шаҳс Америка Қўшма Штатлари президенти бўлишга муносиб эмас", деди Байден.
Трамп эса беморлар сонининг ортишига қарамасдан, иқтисодиётни қайта тўхтатиш мумкин эмаслигини айтди.
"Биз вирус билан бирга яшашни ўрганамиз", деди Трумп. - Бизда бошқа танлов ҳам йўқ."
Шу билан бирга Трамп вирус аста-секин йўқолаётганини таъкидлади. Аммо амалдаги вазият бироз бошқача. Пайшанба куни баъзи штатлар янги анти-рекордлар ўрнатилганини хабар қилди.
Байден эса Трампнинг Шимолий Корея раҳбари, Ким Чен Ин билан бўлган муносабатларини ҳам қоралади. “Трамп Ким Чен Инни дўсти деб атади. Ким Чен Ин эса жиноятчи. У оддий бир жиноятчи. Шимолий Корея ракеталари бемалол АҚШ ҳудудига етиб келиши мумкин”, - деди Байден.
Мунозаралар даврида Трампни ирқчиликда айблашди. “Мен ушбу хонадаги ирқчилик муаммолари бўлмаган ягона одамман. Менинг барча одамлар билан муносабатим яхши”, - деди Трамп.
